G20 hnuaia meeting peng pakhat, B20 Meeting, Aizawla nghah chu nimin khan MZU Auditorium-ah neih a ni a. He meeting hawnna inkhawm, Confederation of Indian Industry (CII) Co-Chairman Pradeep Bagla kaihhruaiah Chief Minister Zoramthanga’n meeting hian Mizoram chu investment tihna hmun tha tak a nihna a phochhuah ngei a beisei thu a sawi.
Chief minister chuan horticulture, agriculture leh ramngaw behchhana state economy thui tak tihhmasawn theih dan sawiin, he thutkhawmin a tum bik – urban planning, infrastructure, bamboo, startups, skill development leh nursing & paramedics te chu Mizoramin theihna a neih thatna a nih thu a sawi a. Mizoram chuan ram dang nena inri a nih avanga insumdawn tawnna leh ram dangte nen inlaichinna kawnga pawimawhna a neih thu a sawi.
Mizoramin mau, thei leh thlai dangte tam tak thar tura hmun remchang a neih bakah a hlutna belhchhan tura processing unit siam hlawkna te, chumi atana investment a remchan dan te, inkalpawhna atan railways leh airways-a hmalak zel a nih thu leh Kaladan Multi Modal Project kal zel leh lawng hmanga insumdawn tawnna tur remchang a awm chhoh zel tur thu te chief minister chuan a sawi a. “Heng zawng zawng hian Mizoram chu insumdawn tawnna hmunpuiah a siam thei a ni,” a ti bawk.
Union minister of state pahnih – commerce & industries changtu, Som Parkash leh external affairs changtu, Dr. RK. Ranjan Singh te pawh he thutkhawmah hian an tel a. Parkash chuan India chu khawvela start up eco-system lian ber zinga mi a nih thu sawiin, hmarchhak state dangte ang bawkin Mizoram chu investment tihna hmun tha tak a nih thu a sawi a. Kawng hrang hranga hmarchhak state-te economy tihhmasawn tura sorkar laipui hmalakna te a sawi.
Dr. Singh pawhin Mizoram chu lehkha thiam an tam avang leh saptawng hmang thei thahnem tak an awm avangin business khawvelah tangkaina tam tak a neih theih thu a sawi a. India hmarchhak state-te chu Asia chhimchhak ramte nen inlaichinna leh insumdawn tawnna atan pawimawh tak an nih thu a sawi bawk.
He thutkhawmah hian urban planning, infrastructure, bamboo, startups, skill development, handloom & handicraft, nursing & paramedics atan te multilateral business partnership siam theihna tur remchangte an sawiho a. Ram hrang hrang palaite leh tual chhung industry neitute inkawmna hunte siam a ni.
B20 thutkhawma tel ram hrang hrang palaite hi vawiina Aizawla Chapchar Kut lawmnaa tel turin Mizoram sorkar chuan a sawm a, vawiin vek tlai lamah an ram lam panin an haw ang.