Aizawl : Nilaini khan thuchhuah siamin MNF party chuan, Assembly budget session tluang taka neih zawh a ni leh Mizoram budget 2023-2024 atan Rs vbc 14341.9464 hman theih tura chhawpchhuah a ni chu lawmawm an tih thu an sawi.
MNF party chuan Assembly Budget Session chhung hian House Leader, Chief Minister Zoramthanga, Minister-te leh MNF MLA rualte chet danah eptu lam leh mipuiin sawiselna tur an hre lo chu lungawi thlak an tih thu sawiin, “An thiamna, thawhrimna leh finnate Zoram mipuiin chhawr tangkaiin hma lam kan pan zelna tur rahbi tharah kan ngai,” an ti.
Thiam tak leh remhre taka finance enkawltu Chief Minister Zoramthanga hi an chhuan thu MNF party hian an sawi a. Minister hrang hrangte pawhin an department enkawl theuh an chiang a, theihtawpin hna an thawk tih a lang hian kumin kum tawp a MLA General Election-ah sorkarna a siam chhunzawm leh ngeina tur nia an hriat thu an sawi.