India hmarchhaka state pathum – Meghalaya, Nagaland leh Tripura-a tun hnaia assembly inthlana vote tlate chhiar zawh takah BJP chu sorkar siamnaah an tel vek dawn.
Tripura-a bial 60 awmah BJP chuan bial 32 an la a, a vawi khat nana chuhtu, Tipra Motha Party (TMP) chuan bial 13 laiin kum 30 chuang ro lo rel tawh, Communist Party of India (Marxist) (CPM) chuan bial 11 an la a, an thawhpui, Congress chuan bial thum lain BJP thawhpuitu, Indigenous Peoples Front of Tripura (IPFT)- bial khat an la ve bawk.
A mala sorkarna siam thei turin sorkar lai, BJP a chak tawk a, IPFT nen sorkarna an siam leh dawn a. Hetih lai hian inthlan an chuh vawi khatnaah TMP an che tha a, eptu party lian ber an ni dawn a. CPM leh Congress tangdun an che tha tawk lo ve thung.
Congress chuan bial lak an nei lo va, 2018 inthlanah khan bial 10 tun tumah lain an che chhe hle a ni.
Nagaland-a bial 60 awmah Nationalist Democratic Progressive Party (NDPP) chuan bial 25 an la a, BJP leh Nationalist Congress Party (NCP) ten -in bial 12 ve ve an chang a, Naga People’s Front (NPF), Lok Janshakti Party (Ram Vilas) leh Republican Party of India (Athawale) ten bial hnih theuh lain mi dangin panga an chang a, Congress-in MLA an nei zo lo thung.
A vawi nga nan NDPP hotupa, Neiphiu Rio chu chief minister a ni leh dawn a, an thawhpui, BJP nen sorkarna siam turin an chak tawk.
Meghalaya-a bal 60 tho awmah rorel lai, National People’s Party (NPP) chuan bial 26 an la a, United Democratic Party (UDP)-in bial 11 changin Congress leh Trinamool Congress ten bial nga ve ve an la a, Voice of the People Party-in bial li lain BJP-in bial hnih an chang a, mi dangten bial ruk an la bawk.
NPP chuan tlinna khawp bial la zo lo mah se an hruaitu, Conrad Sangma chuan chief minister nih zui zel a tum a. BJP-in an thlawp dawn a, party dang thawhpui tel bawkin lalthutthleng a luah zui thei tura ngaih a ni.
Sorkar kal mekah NPP leh BJP hi thawk duna sorkarna chelh sa mek an ni a; mahse, inthlan erawh a hranga chuhin BJP hian ei ru-ah an puh a, inthlan result a chhuah hnuah erawh indawrna kal mekin Sangma bawk chief minister-a thawhho leh an tum dawn niin a lang.