Dallas Mavericks in All-Star guard pahnih an neih hnuah beisei angin hnehna an la chang tluang hleithei lo. Mahse Zirtawpni zingah erawh an harsatna chinfel dan kawng khat an hmu chhuak. Luka Doncic leh Kyrie Irving ten point sawm li chuang ve ve an score a, Philadelphia 76ers lakah an chak.
Mavericks hian American Airlines Center-ah 76ers hi an mikhual a. 133-126 in an chak. Doncic leh Irving te inkawpin point 82 lai an thawh. Doncic-a’n 42 score in assist 12 a nei a. Irving hian point 40 leh assist vawi ruk a nei.
Mavericks hian player pahnihte an neih hnuah game ruk an khelhna niin vawi hnih an chakna chauh a ni.
Dallas Mavericks franchise chanchin a player pahnihin inkhelah a ruala point sawmli an score tlin ve ve vawikhatna a ni a. February thla a Brooklyn Nets atang Irving lalut tura trade lian tak an siam hnuah ‘offensive basketball’ hmuhnawm an beisei ang an khel.
Irving chuan inkhel zawhah, “Kan inkhelh hnuhnun ber zawh hnua ka sawi ang deuh khan ka inlar ve a hun tawh tih ka hria a, ka teammate ten an rawn chhunzawm ve theihna tura ka chet bawk kha a pawimawh.” a ti a.
“Luka pawhin a theihna tak tak lantir a inpeih a, keipawh ka inpeih. Kan pahnih a inkawp kan hlauhawm theihzia lantir kan duh a, zanin chu engkim a kal tluan tum a ni.” tiin a sawi bawk.
Inkhel tan tir lamah Doncic-a’n Irving chet theih nan a pui nasa hle a, assist 12 a neih atanga vawi 8 chu Irving tan a ni.
NBA scoring hmahruaitu ni mek Doncic hian first quarter-ah point 17 a score a, halftime-ah 25 a nei tawh.
Mavericks hi vawi 33 an chakna niin Western Conference-ah parukna an ni mek.
76ers tan Joel Embiid chuan point 35 leh rebound vawi 8 a nei a. Tyrese Maxey chuan point 29 score in James Harden-a’n point 27 leh assist 13 a nei.
Inkhel dangah Golden State Warriors in 115-91 in Los Angeles Clippers an hneh a. Playoffs a thleng thui tura rin Clippers hi a zawna vawi li an tlawmna a ni.