A zawnin vawi hnih tlawm mahse Barcelona in a hun takah hnehna an chang thei a. Real Madrid nen Copa del Rey semi-final first leg-ah inkhelin 1-0 in an chak.
Ningani zanah Santiago Bernabeu-ah Barcelona an leng lut a. Eder Militao own goal hmangin hnehna an chang a. Mualneitu lamin ball chang hnem zawkin inkhel thunun zawk mahse Barca an tang tluan thei.
Manchester United lakah Europa League a an tlak hnuah Almeria in La Liga-ah an hneh leh a, hei vang hian El Clasico a hnehna chan hi Barcelona tan result lawmawm a ni.
Xavi Hernandez-a pawlte hian uluk taka inven an mamawh ngun a. Real Madrid in goal chance nei nual mahse Barca an tang khawng tlat a. Inthlahdah miah lova an mawhphurhna an hlenchhuah theih chu an chakpui a. April 5 a Spotify Camp Nou a second leg an khelh hunah chan tha zawk changin bul an tan ang.
An inveng hlawhtling
La Liga hmahruaitu an ni chungin tunhnaiah result tha an nei lo. Europa League a an tlawm hnuah Almeria in an barakhaih a, hneh theih an ni tih a lang chiang.
Xavi-a’n a starting XI-ah mi panga a thlak danglam a, a tlarhnung thlak danglam hlakin Alejandro Balde, Marcos Alonso, Jules Kounde leh Ronald Araujo te a tlar.
Real lansarhna inkhelah Barcelona in mumal taka goal an nawr hmasak berah goal an khung a. Franck Kessie goal shot chu Thibaut Courtois chuan dang mahse Militao a per a, goal-ah a lut.
Barca goal hi offside vanga pawm loh ni hman mahse VAR hmanga ennawn a nih hnuah goal-ah pawm a ni.
Barca tlarhnung hian tun season-ah league match 23 atang goal 8 chiah an chhuah a. Attacking football larpui team nimahsela goal ven pawh an thei tih a lang a. League leh Cup ‘double’ la turin an tlarhnung phui tha hi a pawimawh dawn.
Inkhel zawh lam
An mamawh result nei mahse Barcelona coach Xavi Hernandez chu a lawm vek lo. “Kan goal ven dan leh kan inpeknaah ka lungawi. Madrid in chance an neih tam lutuk lohna turin kan inrem a, an mualah chance an insiam hnem thin hle.”
“Kan tan result tha a ni a, hei hi ka lawm. Mahse ball chan hnem kawngah leh kan ball chan te kan hman danah erawh hmasawnna tur kan la ngah hle. Kan tumdan chuan ball thunun a, ball chang chunga kan goal venhim kha a ni a, khatah kha chuan kan hlawhchham chiang hle.” tiin a sawi.
Real goalkeeper Courtois chuan, “Inkhel kan thunun a, nidang zawng aiin goal venhim an tum nasa. Kha vang khan goal shot mumal pawh neih a harsa. Mahse kan kheltha a, engkim kha kan thunun zawk.” tiin a sawi.