India-a Supreme Court chuan ngaihdan pahnih (bipartisan panel) neia election commissioner tur thlang turin thutlukna a siam a, hetah hian prime minister leh chief justice an tel dawn a. Hei hian sorkarin ama duh zawng a thlang thin nia sawina a tihtawp beisei a ni.
Election Commission of India hi danpui hnuaia sorkar tihbuai phak lovah thuneihna hran nei a ni a; mahse, eptu party-te chuan hma a lak dan tam takah rorel lai lam thatna turin a ti niin an lo sawi tawh thin a, commission erawh chuan chutiang a awm loh thu an sawi thin.
Panel tharah hian parliament rorelna in hniam zawk, Lok Sabha-a eptu leader emaw, member ngah ber party-a an hruaitu emaw a tel dawn bawk a ni.
Justice K M Joseph chuan, “He kal dan hi parliament-in dan anga a siam hma chuan kalpui a ni ang,” tiin Ningani khan a sawi.
Justice Joseph-a hian election commissioner ruattu tur committee hran din tura ngenna, petition thahnem tak lut ngaihtuahtu, constitution bench-a an hotu a ni.
Tuna kal danah chuan president-in kum ruk chhung zel atan chief election commissioner leh commissioner pahnih a ruat thin a, ani hi a ruattu ni mah se sorkar rawtna ang zawma ruattu ang deuh chauh a ni a. Tih dan tlangpuiah chuan sorkar hnathawk sang chawl tawh ruat an ni thin.
Petition thehluttute aiawha ding dan hre mi, Prashant Bhushan chuan thutlukna chu ‘chhinchhiahtlak’ a nih thu a sawi.
“An sawi thin angin mipui rorelnaah chuan election commission hranpa hlak hi mamawh a ni a, sorkarin election commissioner-te a ruatna hmunah chuan a hran hlakin a kal thei ngai lo,” tiin court tuala thuthar lakhawmtuten an kawmnaah a sawi.
Chief election commissioner hlui, S Y Quraishi pawhin ‘rei tak kan lo nghah tawh chu a tak a chang ta’ a ti bawk.
“A tawpah chuan Supreme Court-in a rel fel ta,” tiin Twitter-ah a tar lang a. “Kan duh hi kum 20 chhung tihkhawtlai a ni tawh a. |an bik nei lova election commission a awm theih nan a tul hle a ni,” a ti.
Chanchinbumi leh political analyst Rasheed Kidwai pawhin court thutlukna chuan India-a mipui rorelna chu a tihchak sawt tur thu Al Jazeera hnenah a sawi.
“Mipui rorelnaah chuan thil kalpui dan hi a hrin chhuah nen a intluk reng a. India-ah hian eptu party tam tak chu thil kalpui danah an lungawi tawk lo va, chuti chungin inthlan hi an hmachhawn thin a ni,” a ti.
Kidwai-a chuan election commissioner chu umpire ang a nih thu leh tan bik nei lo a nih a ngaih thu a sawi a. “Mahse, a chang chuan election commissioner-te kal dan hi a khingbai angin a lang lek lek thin a ni,” a ti.
“Hetiang thlir hian court thutlukna hi a lawmawm a. Mipuiten lungrual takin election commissioner chu an ringhlel lo vang a, political party lam an awn lo tih an chiang bawk dawn a ni,” a ti.