Indian Army-te chuan North Sikkim-a Samdong leh Lachen inkara vur tla nasa lutuk kara tang mi panga an chhanchhuak a. An zingah hian truck khalhtute leh an mi phurhte pawh an tel.
Guwahati-a sipai thupuangtu, Lt Col P Khongsai chuan chhanchhuah hna h January 29 zan dar 9-11 inkar khan thawh a nih thu a puang.
“North Sikkim-ah hian January 29 chawhnu lam atang khan vur a sur nasa hle,” a ti a. An mi chhanchhuahte hi Samdong atangin Siliguri an pan niin a sawi.
“Tlai lam atangin kawngah an tang a, vur hi feet hnih laia thuk leh chhah a nih avangin kea kal ngaihna pawh a awm lo va, lirthei khalh phei chu a hlauhawm em em a ni,” tiin a sawi.
“An vaiin him taka chhanchhuah an ni a, Indian Army post-ah lak nghal niin damdawi, ei tur leh thawmhnaw lumte pein camp-ah hian zan riahtir an ni bawk,” tiin Khongsai chuan a sawi.
India hmarchhakah hian Arunachal Pradesh hmarchhak leh Sikkim-ah hian thlasikah hian vur a tla nasa thei hle thin.