Aizawl : Nimin atang khan KTP rorel inkhawm vawi 10-na chu Zemabawk kohhran biak in-ah tan a ni a, Pathianni zan thleng a awh ang.
Nizan khan palai lawm leh report inkhawm neih niin, CKTP Asst. Leader LV. Lalthantluanga’n a kaihruai a. Synod Secretary Upa B. Lalhmunliana’n KTP Kumpuan hawngin, rorel palai ten Gen Secretary report, Finance report leh bial report te an ngaithla a ni.
Vawiin nilengin ro an rel ang a, zanin inkhawm ah Gen Secretary kalchhuak Upa Rochungnunga’n thuchah a sawi ang. Naktuk chawhmaah Synod Moderator Rev. Dr. C. Chawnghmingliana’n Pathian thuchah a sawi ang a, chawhnu ah Synod Executive Secretary Rev. Dr. K. Lallawmzuala’n thuchah sawi ve lehin, zan inkhawmah Central KTP Leader Rev. Dr. F. Pachhunga’n Pathian thuchah a sawi ve leh ang.
Synod 2022 report-a a lan danin KTP branch 891 awm mekin, member 1,57,830 (mipa 97,542 leh hmeichhia 60,288) an awm mek a ni.