March 29-a Lunglei Municipal Council (LMC) inthlan lo awm tur atan party hrang hrangte an inbuatsaih chho mek a, MNF, Congress, ZPM leh BJP party-ten ward 11-ah candidate neih vek an tum.
The Zozam Times-in party pali hruaitute hi bebawpin an hmalakna a zawt a, ward 11-ah candidate neih vek an tum thu an sawi rualin, candidate turte thlanga ruahmanna an neih chhoh mek thu an sawi hlawm.
State-a rorel lai, MNF party Vice President Lalthlengliana chuan, “Candidate turte hi kan ruahman chho mek a, kan la final lo deuh,” a ti a; LMC inthlan hmasa berah hian sorkarna an chan ngei an beisei thu a sawi.
Lunglei District Congress Committee President R. Lalnunthara chuan ward thenkhata an candidate turte chu an thlang fel tawh niin a sawi a. Hetihlai hian Ninganiah mipa ward leh hmeichhe ward tur te puan chauh a nih avangin ward thenkhatte chu la tihfel theih chiah loh an neih thu a sawi.
District congress hruaituten candidate atana an thlante chu Mizoram Pradesh Congress Committee hruaitute hnenah an thlen leh dawn tih a sawi a, LMC sorkar hmasa ber chang thei turin beiseina an neih san thu a sawi bawk
ZPM Working President K Sapdanga pawhin LMC inthlan chu an nghakhlel hle tawh nia sawiin, candidate turte chu ZPM Lunglei Sub Headquarters kutah dahin an enho leh tur thu a sawi a. “LMC inthlan hun hi kan nghakhlel a, kan phurin beiseina pawh kan nei sang hle,” a ti.
BJP pawhin LMC inthlan lo awm turah ward 11-ah candidate neih vek an tum thu State President Vanlalhmuaka’n a sawi a, candidate thlang tur committee an din thu leh hun reilo te hnuah BJP ticket-a ding turte chu puan theih an inbeisei thu a sawi.
Tar lan tawh angin, State Election Commission chuan Ningani khan LMC inthlan hun tur hi a puang a, Lunglei mipuiten an khawpui enkawltu tur thlangin tun March 29 zing dar 7 atanga tlai dar 4 thleng vote an thlak dawn a ni.