Jakarta-a tuialhthei dah khawmna hmun kang avanga chenna in tam tak kang chhiain mi 17 an thi a, an zingah naupang pahnih an tel.
Kangmei hi Zirtawpni zing dar 8:00 (India-a zing dar 6:30) pelh deuhva Pertamina-in an dah khawpna, Plumpang fuel storage depot-a chhuak a ni a, a bul hnaia in man kai nghal thuaiin mi chen tamna lai a ni a, an chiai nasa hle.
Mi 60 zetin hliam an tuar a, thenkhat phei chu an kang nasa hle a, depot bul hnaia cheng tam tak hmun himah sawn an ni.
North Jakarta Red Cross chuan mi 342 sawn chhuah an nih thu leh puan in pali kaihah khawsaktir an nih thu a sawi.
Indonesian thuneitute chuan mi pathum chin an la hre lo tih an sawi a, Inrinni khan ram chhunga tuialhthei hmun zawng zawngte him leh him loh endik nghal a ni.
Vice President Ma’ruf Amin chuan Inrinni khan chhiatna thlenna hmun hi tlawhin mi 17 an thih thu leh mi 60-in hliam an tawrh thu a sawi.
Tuialhthei dah khawlna hmunte hi mihring chenna hmun hnaih lova dah a tul hle niin a sawi bawk.
“He depot pawh hi sawn ngei a nih ka beisei a, a him zawk thei dawn a, heng lai hmun pawh hi a nihna pangngai anga siam leh a nih ka beisei,” tiin thuthar lakhawmtute hnenah a sawi.
Zirtawpni zana video thehdarhah chuan te tengtung chungin mite chu kawng chep takah an tlanchhia a, van lamah kangmei khu a inzual chho tup tup bawk.
Jakarta hmar lama chhiatna thlengah hian mei pawh van lam hawiin a inhlap chho nasa a, siren a ri nasa hle bawk.
A bul hnaia cheng pakhat, Abdul Syukur chuan kangmei a chhuah hma darkar chanve vel atang khan tuialhthei rim nasa taka a nam thu Kompas TV hnenah a sawi.
“A rim kha a na hle a, thenkhat phei chu an uak tuar tuar a, an luak hial a ni,” a ti.
Mi dang pakhat, Swastono Aji chuan ‘a rim chu a nat em avangin thawk a harsa hial’ tiin AFP news agency hnenah a sawi.
“Thil puak ring tak kan hriat rualin kan tlanchhe nghal a ni,” a ti.
“Bomb ang mai a ni a, suangtuah phak bak a ni,” tiin kum 45 mi, Jamilul Asror chuan AFP chuan a sawi a, a hmun chu sawn ngei turin an duh tih a sawi.
National Police chief Listyo Sigit chuan mi pathum chin hriat an la ni lo tih thuthar lakhawmtute hnenah a sawi.
Thuneitu sangte chuan kangmei chhuah chhan hi chhui nghal a nih tur thu an sawi a, an rama hetiang hmun dangte pawh endik nghal an ni.
Tun tuma kangmei chhuakah hian lirthei pawh thahnem tak a kang chhe tel.