Tun hnaia Tripura assembly inthlana MLA ngah ber dawttu, Tipra Motha Party chuan an state-a ram danpui anga an thil phut tihhlawhtlin a nih theih nan BJP nena inbiak an inpeih tih a sawi.
Tribal mite party anga sawi theih, lal thlah, Pradyot Manikya Debbarman-a kaihhruai hian inbiak an peih thu an hma hma lawk hian Assam Chief Minister Himanta Biswa Sarma chuan inbiak chhunzawm an duh thu a sawi ve bawk.
“Assam Chief Minister Himanta Biswa Sarma-a’n min be turin a inpeih tih a sawi ka lo hria a. Zah taka min rawn dawr a nih chuan nihna duh vang ni lovin kan lo dawr ang. Tripura-a danpui anga thil a kal theihna tur chauhvin kan lo bia ang,” tiin Debbarman chuan a sawi.
“Tripura-a lo cheng hmasa a ni a. Tripura-ah hian kan dikna hlamchhiaha ro an rel thei nia an inngai a nih chuan harsatna an tawk ang. Tipra Motha hi Tripura-a lo cheng hmasate tan danpui hnuaia dikna chanvo an neih theih nan din a ni,” a ti.
“Tripura mipuiten min vote a, kan hlamchhiah thei lo,” tiin a sawi.
“Danpui hnuaia kan dikna chanvo kan neih theihna tura beitute kan ni a. Ziaka kan duh ang an peih a nih chuan kan inkawm thei ang. Tripura mipuiten min vote a, nihna chanvo duh vang ringawtin an dikna chanvo hi kan hlamchhiah thei lo vang,” a ti.
Inthlan result a chhuah hnuah khan hmarchhaka BJP thluakbur ber, Sarma chuan TMP-in an thil phutte chu sorkar laipui leh Tripura-a BJP sorkar indawrna nena thiltih ngai a nih thu a sawi.
Inbiakna chu BJP leh TMP inkara kalpuiin ram danpui hnuaiah zel, Tripura thendarh tumna rilru pu chunga kalpui chi a nih loh thu Sarma chuan a sawi bawk.
Tun hnaia inthlanah khan Debbarman kaihhruai TMP hian a vawi khat nan inthlan an chuh ve a, bial 60 awmah bial 13-ah hnehna an chang a. BJP chuan bial 33-ah hnehna changin sorkarna an siam thei a, Left-Congress tangdunin bial 14 an la bawk a. Trinamool Congress chuan MLA an nei zo lo.