Aizawl: Khawzawl Darngawn ram, Pengpui tlanga bawlhhlawh sakhat sawngbawlna tur Solid Waste Management Centre sak mek chu Inrinni khan UD&PA Department changtu, Deputy Chief Minister Tawnluia’n a tlawh a, hna thawh tawh dan leh hmabak chhunzawm dan turte a enfiah.
Solid Waste Management Centre sak mek hi Special Central Assistance 2020-2021 sum Rs. nuai 60 senga siam a ni a, tun dinhmunah kawngpui atanga a hmun panna approach road chu RCC-in metre 400-a thui, metre 3.5-a zau siam zawh a ni tawh a, internal road metre 200-a thui siam a ni tawh bawk a. A luh tanna, main gate, bawlhhlawh tawih thei leh tawih thei lo thliar hranna, Segregation Platform (45 m x 38 m), Site Office leh RCC Water Tank litre 27,000 dawngte siam tawh niin, a hungna metre 150-a thui siam a ni tawh bawk.
Tuichang bialtu MLA, Deputy Chief Minister Tawnluia hian Khawzawla Solid Waste Management Centre dinna tura hmunhma buatsaih hrang hrang thawh zawh tawhte bakah puitlin a nih theih nan ruahmanna siam a nih thu sawiin, sorkar kum tharah UD&PA department kaltlanga hmalak chhunzawm tum a nih thu a sawi a. Khawpui a than ang zelin khawsaknain a ken tel bawlhhlawh pawh a pung a, heng bawlhhlawhte hi mumal tak leh awmze neia sawngbawl a pawimawh tawlh tawlh dawn niin a sawi.