Bangladesh chhimchhak lama Rohingya raltlante bit taka an khawsakna refugee camp-ah Pathianni khan kangmei nasa tak chhuakin mi sang chuang chenna tur nei lovin an awm phah.
Cox’s Bazar-a kangmei chhuak hi thunun tawh a ni a, chenna 2,000 vel a kang chhia.
Mi 12,000 chuang zet, Myanmar rama tharum thawhna tlansana khawsate chenna a kang chhia a ni.
Kangmei a chhuah chhan hi hriat a ni lo va, mihring thi leh hliam an awm pawh hriat a ni lo.
Kangmei hi chawhnu dar 2:45 (India-a chawhnu dar 2:15) vela chhuak niin inte hi mau leh tarpaulin maia sak an nih hlawm avangin rang takin a inman kai ta a ni tih thuneituten an sawi.
“Chawnna 2,000 vel a kang a, Myanmar mi 12,000 chuang zette chu awmna tur an neih loh phah mek,” tiin Bangladesh-a refugee commissioner Mijanur Rahman chuan AFP news agency a hrilh.
Darkar thum vel chhungin kangmei hi thunun hman a ni a, raltlante mosque 35 leh thil an zirna hmun 21 pawh a kang chhe tel tih a sawi.
International Federation of Red Cross and Red Crescent Societies hotu, Hrusikesh Harichandan chuan camp hi ‘a chhe nasa hle’ tiin BBC a hrilh.
Tui lakna leh test-na hmunte pawh a chhe tel niin a sawi.
“Ka chenna a kang a, ka dawr pawh a kang chhia,” tiin kum 30 mi, Rohingya mi, Mamun Johar chuan AFP a hrilh.
“Kangmei hian ka neih zawng zawng tak tak tak min laksak a ni,” a ti.
Ramri district-a Rohingya maktaduai chuang chenna zinga pakhat, Camp 11 an tih chung lamah chuan meikhu dum tak a inzial chho tup tup.
Camp-ah hian mi an cheng tamin an in sakna hmanruate chu kangmeiin a man hma tak tak a ni.
Rohingya-te hi Buddhist tamna, Myanmar mi niin Muslim an ni ve thung a, an ramah kum tam tak tihduhdahna lo tuar tawh an ni.
Bangladesh-a a hlawma an luh tan hi Augyst, 2017 kha niin Rohingya helten police hmun eng emaw zat an beih chhan let nana Myanmar sipaiten tha an thawhnaah an tawrh nasat em avanga tlanchhia an ni.