Indian kangthelhtute chuan bawlhhlawh sawngbawlna hmun kang thelh tumin an bei mek a, he kangmei chhuak avang hian Kerala-a Kochi khawpui chhung hmun tam takah meikhu hlauhawm tak (toxic smoke) a lut nasa hle.
Ni tin bawlhhlawh tonne eng emaw zat sang bawlna waste management plant-a kangmei chhuak hi kar hmasa tawha intan kha a ni.
Mi chengte chu pawn chhuak lo tura thurawn an ni a, an chhuak a nih pawhin N-95 mask hmang turin an ngen bawk.
Tual chhung thuneitute chuan naupang tê lam kaina sikulte khar rih turin thu a pe bawk.
Pathiannia state sorkarin dinhmun thar a tihchhuahah chuan kang hi an thunun tawh thu leh thelh mih thuai a nih tur thu an tar lang.
India-ah hian bawlhhlawh chhekkhawlna hmunah hian kangmei a lo chhuak fo tawh thin a, a tam ber hi bawlhhlawh tawihin boruak alh duh tak, methane a siam atanga intan a ni thin.
Brahmapuram waste plant hi Kochi khawpui hmawr tawpa awm a ni a, bawlhhlawh a sawngbawl tam theih avanga hriat hlawh a ni a. Plant hi Kochi khawpui thuneitute ta leh an enkawl a ni.
Thuneitute chuan kum dangah pawh tun ang hunah hian khaw lum lutuk avangin kangmei a chhuak duh tih an sawi a. Tual chhung mite pawhin a hmain kangmei a chhuak fo leh plastic kang khute chu mihring hriselna atan a that loh avangin duh lohna an lo lantir tawh thin.
Tun tuma kangmei chhuak hi a chhan tak hriat a ni lo va. Kangthelhtu pakhat chuan sawngbawl muan avanga plastics inchhekkhawl tam tak chu khaw lum na takin a em sat lutuk avanga chhuak a ni thei tih Press Trust of India a hrilh.
A thelhtute zingah pawh meikhuin a ur nasat leh an hip lut nasat avanga luak chhuak leh khaw hmuh fiah lo an awm nual a. Fire department-a thawk mi 20 vel zet hetiang hian an awm nia sawi a ni.
State Health Minister Veena George chuan kum upa, naupang, nau pai lai leh thawk lama harsatna neite chu meikhu hip lo tura awm hram hram turin a ngen.
George chuan sorkarin khawpui chhunga damdawi inte chu thawk lama harsatna nei enkawl tura inring tura tih vek an nih thu a sawi a, tun thleng erawh chuan harsatna lian lutuk nei an la awm lo niin a sawi.
Police chuan kangmei chhuah chhan hi an chhui mek a. State sorkar hnuaia pollution control board chuan tual chhung thuneitute chu bawlhhlawh sawngbawl dan zam an zawm loh avangin Rs. maktaduai 18 pe turin a ti.