Sikkim chuan Pathianni khan nute puihna tur scheme thar a tlangzarh a, nu zawng zawngte puihna tur a ni.
Scheme-in a tum chu hmeichhia, pasal leh fate nei, hna mumal nei lo zawng zawngte suma puih a ni.
Sikkim-a assembly bial 32-ah a dawngtu tur nu 14,000 vel an awm dawn a, an zingah hian hmeichhia kum 18 leh a hung lam, pawn lama hna thawk lo, an chhungte zinga sorkar hnathawk awm lo te an tel dawn a ni.
Scheme hmang hian kum khat chhungin nute chu Rs. 20,000 pek an ni dawn a, nu zinga hna thawk lo, pawmlai nei leh then tawh pawh an tel dawn bakah mipat hmeichhiatna hman sualna tuartu te an tel dawn bawk.
Scheme thar hi ‘Aama Sasaktikaran Yojana’ tih a ni a, Chief Minister PS Tamang chuan Rangpo, East Sikkim-ah a dawngtu tur mi 14,000 hnenah cheque a hlan a ni.
“Kum 2023-ah hian he scheme atan hian Rs. Vaibelchhe 100 da a ni a, nute chawikanna tura atana tih a ni a. Rs. 20,000 hi an bank account-ah thun a ni ang a, chung pawisa chu an mamawh ang zelin in hmang thei dawn a ni,” tiin chief minister chuan thuthar lakhawmtute hnenah a sawi.
Chief minister hian nute hi in chhungah tul tinreng an thawk a, khawtlangin a hlamchhiah leh si niin a sawi a, “Sikkim sorkar hian in chhunga pasaltha, fak hlawh si lote chawikan hi a duh a ni,” a ti.
Sikkim sorkar chuan he scheme ang hi India rama hmang hmasa ber an nih thu an insawi a, intluktlang taka nute hnena innghahna tur pe hmasa berah inchhalin nute mai bakah he scheme hian an chhungkaw pum pawh a chawikang thei dawn niin an sawi.
“Nute puihna tur hi anmahni tan bakah an fate zirnaa tul atan te, an chhungkaw sum lak luh tihpun nan bakah an mamawh tul dang apianga hmangin chhungkaw tan pawh thil tangkai tak a ni tel dawn a ni,” tiin state sorkar chuan a sawi a ni.
He programme hmang hian state sorkarin hna nei lo nute hnenah pawisa khawl a neihsak dawn tih a sawi bawk.