Aizawl: Tun hnaiah vawk thi an awm tan leh avangin Lungsen khuaa vawk vulhtute an mangang ru leh tan a. Vawk thite hi African Swine Fever (ASF) kai ni ngeia hriat a ni.
Thu dawn danin kum 2021-a nasa taka ASF lengin an vawk vulhte hri a suatsak hnuah Lungsen khaw mipuite hian hma thar an la chho mek a. Vawk vulh pawh thahnem tak an awm leh tawh.
Hetih lai hian tun hnaiah khaw chhunga vawkpui rai lai, vawkpui no hruai leh vawk note an thih leh tak pheuh pheuh avangin an mangang ru tan hle.
Hemi chungchangah Tlabung Senior Veterinary Officer Dr K Lalhlimpuii chuan, “Kum 2021-a ASF len laia vawkte kha suat vek an nih loh avang leh vawkin disinfectant that tawk loh awm palh thei a nih avangin ASF hi a la cham a nih rin a ni a. Chutih laiin, a hma ang em em kha chuan a thih puk puk tawh loh chu kan beisei,” tiin, vawk thite hi ASF ni ngeia an hriat thu a sawi bawk.
Vawk thi a awm leh tan avang hian Lungsen I Village Council chuan khaw dang atanga vawk la lut rih lo turin mipuite ngenna a tichhuak tawh a. Vety department pawhin ngaihven nghalin nimin khan Mobile Veterinary Unit (MVU) team chuan Lungsen an pan.
Lungsen khuaa vawk vulhtute hian ASF a len vanglaia an vawk zawng zawng an chân khan zangnadawmna engmah an hmuh ve loh avangin ASF leng avangin a thlawnin an chân nawn leh ang tih an hlauthawng hle nia thudawn a ni.