AIZAWL: Serchhip huam chhunga National Highway 54 kawngpui laih zauh hna thawktu, KRAM Company chuan an inremna an lo neih tawh anga hna an thawh loh avangin nimin khan New Serchhip North Branch YMA-in an hnathawk tur an dang.
NH 54 laih zauh hnathawh mekah New Serchhip North thlanmual kawng tihpin a ni a, YMA leh hna thawktu company-ten thlanmual kawng siam that dan tur chungchangah inremna an lo neih tawh anga hna an thawh loh avang leh, thlanmual chhak lama company hnathawkten leivung an paih chhunzawm avangin New Serchhip North Branch YMA member-te chuan an huam chhungah hnathawk turte an dang a ni.
New Serchhip North Branch YMA hruaitute hian KRAM company hotute hnenah thlanmual kawng siam dan tura an inbiak tawhnate tihlawhtling a, thlanmual ram chinah leivung dawlna tha tak chu vawiin atang la laa an duh anga hna thawh tan an phut thu te, YMA-in thlanmuala tuizem (polythene tank) an dah, thlanmual chhak lama leivung paihin a tichhiat pawh chawi turin an phut a ni.
KRAM company hian thlanmual ram china leivung dawlna siam hna thawk tan turin excavator pakhat tir lutin hna thawh an tantir nghal bakah thlanmual kawng siam hna an lo thawh tawh pawh chawlhsana YMA duh dan anga siam tura hma lak nghal an tum tih an sawi hnuah lirthei dante chu chhuahtir an ni.
YMA lam hian company hnathawh dan hi an vil chhunzawm zel tur thu an sawi bawk.