Aizawl: Thawhtanni khan MNF party chuan Lunglei Municipal Council (LMC) inthlan lo awm tur inbuatsaihna atan Lunglei khawpui chhungah kawngzawh (rally) an huaihawt a, MNF President Zoramthanga’n a hmanpui.
MNF president chuan LMC inthlanah an party candidate an thlan tlin ngei a beisei thu a sawi a. MNF party candidate an thlan tlin chu an inchhir loh tur thu sawiin, LMC dintu an nih angin a hringtu ngeiin hnute tuia a chawm sei len tluka tha a awm lo tih a sawi.
Zoramthanga chuan Lunglei by-pass road atana Rs. vbc 10 ruahmanin a daih loh avangin Lunglei khawpui tana hmasawnna turah hman a nih thu sawiin, “By pass road zawh felna daih tur chuan Rs. vbc 330 vel a ngai a, chutiang daih tur project siam a ni tawh a, nawr mek a ni,” a ti.
MNF president hian Pathianin MNF dinchhuahna tur hun a ruat chu a thleng chho mek nia sawiin, MNF beitute chu an ral zel tih a sawi a. Pathianin a hun a tih chuan sorkarna siam tham MLA a pe mai niin a sawi a. ZPM chu theihtawpa inhampuar nan Lalduhoma chu chief ministerial candidate atan an zuar a, kalphung thar hlir vawi 10 vel nei tawh mah se mipuiin engah mah an ngai lo niin a sawi a. Congress party pawh beih tham an awm lo niin a sawi bawk.
He hunah hian MNF Vice President Lalthlengliana pawhin thu a sawi bawk.
Kawngzawh hi Pukpui kawnah hawn a ni a, Zobawk Community Hall tualzawlah kharna hun hman a ni.