Pathianni tlaia a thawhpui mi pahnih kap hlumtua puh, Havildar Bimal Kanti Chakma chu a hna atanga bân nghal a ni a, Mizoram Police hotute chuan, “Hetianga chhiatna hmingchhiatthlak tak ang hi Mizoram Police chhungah a la thleng ngai lo,” an ti.
Mizoram leh Assam inrina, Buarchep-a duty police leh police an inkah chungchang sawifiahin IGP (Hqrs) John Neihlaia leh police hotu dangten nimin khan thuthar thehdarhtute kawmin, ramria duty police-in a thawhpui a kah hlum chungchang an hrilhfiah a, Hav. Bimal chu Koalsib District Jail-a dah a nih thu an sawi.
IGP chuan Assam ramria duty, kum 52 mi , Hav. Bimal-a’n March 5 zan dar 6:16 khan Buarchep-a an main camp bul, oil palm hmuna NCO barrack-ah a thawhpui, Hav. J Lalrohlua (51) leh Hav. Indra Kumar Rai (53), 2nd BN MAP-a mi ve vete chu a silai, AK 47 Rifle hmangin a kap niin a sawi a. Hav. J Lalrohlua chu a hmunah a thi nghal a, Hav. Indra Kumar Rai erawh Vairengte CHC thlenpui a nih hnuah a hliam tuar lovin a thi niin a sawi.
Hav. Indra Kumar hian amah bawihsawmtute hnenah inhnial buaina an neih loh thu leh Bimal-a chuan silaia a kah ringawt thu a hrilh hman niin a sawi bawk.
Hav. J Lalrohlua chu a hnung lam atanga a lu-a kah niin IGP chuan a sawi a. Hav. Indra Kumar Rai chu a awm vei lama kah niin a malpuiah silai mu a tlang niin a sawi.
IGP-in a sawi danin, inkahna a thlen hnua post commander leh mi dangten duty-na hmun an thlenin Hav. J Lalrohlua ruang chu choka chhuatah hmuh a ni a, Hav. Indra Kumar Rai erawh inkahna hmun atanga ft. 40 vela hlaah hliam tuara hmuh a ni thung tih a sawi.
IGP-in a sawi danin chhiatna thlenna hmunah silaimu kah ruah tawhna cartridge 15 hmuh a ni a, police pahnih kaphlumtua puh, Hav. Bimal-a chu man nghal niin a mi kahhlum tak mi pahnihte chuan a zu in an pute hnena an report thin avanga kap ta niin police hmaah a sawi a ni.
Hav. Bimal chu police-a awm reng tlaka an ngaih loh avangin inquiry pawh tibuai lovin India Danpui tlawhchhanin a service atanga bân nghal a nih thu IGP chuan a sawi a. Vanduaina tawka thi ta mi pahnihte chu ral laka nunna chân ni lo mah se, ramria duty an nih avangin an chhungte hnenah hna pek an dilsak thu leh an chhungte chu sorkar hna pek an nih tur thu a sawi.
The Zozam Times zawhna chhangin IGP John Neihlaia chuan hetiang vanduaina hi Mizoram Police chhungah a la thleng ngai lova an hriat thu a sawi a. “Ruih avanga insual te, inhnial buaina avanga mahni pute silaia han tin te emaw, tihpalh thila silai hmet puak palhte chu awm mah se, thinrim avanga mahni thiante kap hi chu an la awm ngai lovin kan hria,” a ti.
IGP chuan, “He thil thleng hi communal thil a ni lo va, mi mal thil liau liau, zu in thin leh in thinte thu atanga lo thleng a ni a, chi leh chi, hnam leh hnam ang zawnga thil lak loh tha kan ti,” a ti bawk.
Hav. J. Lalrohlua ruang chu nimin khan helicopter hmangin an khua, Lawngtlai, Chandmary phurh thlen niin, vawiinah vui a ni dawn a. Hav. Indra Kumar Rai pawh nimin vek khan helicopter hmangin an chenna, Luangmual, Lunglei phurh thlen niin nimin vek khan vui a ni thung.