Mizo Zirlai Pawl (MZP) bultumin nimin khan ‘Zoram Ni’ hman a ni a, MP (Rajya Sabha) K Vanlalvena’n khuallian niin a hmanpui a, zalenna sual lo anga mi thenkhatin an sawi chu an hriat fuh tawk loh vang niin a sawi.
Vaivakawn Cultural Centre-a hun hmanah K Vanlalvena hian March 5, 1966 hi Zofate tan tawrhna rapthlak tak a ni tih hi hriat thar a pawimawh hle tih sawiin, “Vawiina hetiang hun kan hmang hi India sorkar lakah inlak hran tum lehna ni loin, khatih hun laia Mizo mipui tawrhna kan hre reng a, chu chuan ram leh hnam hmangaihnaah harh thar lehna hun atana hman a tul a ni,” a ti.
K. Vanlalvena chuan tun hnaiah mi thenkhatin zalenna an sual lo tih a awm thin chu thil hriat fuh tawk loh vang a nih thu a sawi a. “Bomb hmanga beih hial kan nih hnuah party inan loh avanga tun hnuah hetiang sawi a awm thin hi a pawi a, Mizoram history nuai reh tumna a ni,” a ti a, Mizo nationalism chu bomb hmangin tireh tum mah se engtikah mah a reh a rin loh thu leh thangtharten hei hi an chhawm nung zel a beisei thu a sawi bawk.
Khuallian K. Vanlalvena hian B. Vanlalvuana lehkhabu ziah ‘Ram zun ngaih leh ‘D’ zun’ tih lehkhabu a tlangzarh nghal bawk.