Aizawl : Mizoram khawpui fai intihsiak, 2022-a District Hqrs., fai bera thlan Khawzawl-in nimin khan fai lawmman an lak an lawm a. Bialtu MLA, Deputy Chief Minister leh UD&PA changtu ni bawk Tawnluia’n he hun hi hmanpuiin, Khawzawla VC hrang hrang ten an huam chhung khawlaia an hun tur bawlhhlawh bawm lian a sem.
Deputy Chief Minister chuan Zoram pum huapa fai intihsiaknaa Khawzawl khawpuiin pakhatna dinhmun a hauh thei leh Khawzawl Dinthar VC-in District Hqrs. chhunga fai ber nihna dinhmun an hauh avanga lawmawm a tih thu a sawi a. Khawzawl bakah Biate leh Khawhai ten faina kawnga dinhmun tha tak an hauh avanga lawmawm a tih thu pawh sawiin, fai ber nih lawm chu changkang a tih thu a sawi.
Faina kawnga inzirtirna tam zawk neih zel a pawimawh thu Tawnluia chuan sawiin, faina chuan thianghlimna, mawina, rimtuina leh hriselna thlengin a siam thin tih a sawi a. “Fai reng turin taimak a ngai a, taksa, in leh a vel leh vantlang hmunte vawngfai reng turin thahnemngai taka thawhho tlan a pawimawh” a ti.
Deputy CM chuan a enkawl department pahnih – PHE leh UD&PA department kaltlangin thingtlang leh khawpui faina beihpui thlak a nih thu a sawi a. District naupang tak Khawzawl district-in faina kawnga entawntlaka hma an chu fakin, official, department, VC, NGO leh mipuite inpekna chhuanawm a tih thu a sawi.
An thlen chinah lungawi mai lova, tun dinhmun aia sang zawk ngaihtuah chunga hmasawn zel tura tanlakpuiah district mipuite a sawm a. Khawzawlah bawlhhlawh thliarhran kalpui a ni pawh hmasawnna pawimawh tak a nih thu sawiin, faina chu naupangte atanga tana inzirtir a tul thu a sawi.
Bawlhhlawh sawngbawlna hmun Solid waste management centre, Urban town hrang hranga siamna tur Rs vaibelchhe 10.5 hu project sorkarin North East Special Infrastructure Development Scheme (NESIDS) hnena a thehluh cuh pawm tawh a nih thu Tawnluia chuan a sawi a. Hemi atana hmalakna turin state budget atang pawhin Rs. vaibelchhe 50.45 dah a nih thu a sawi bawk.
Khawzawl hian District Hqrs. zinga fai ber lawmman Rs. 3,33,333 leh thuziak an dawng a, Khawzawl Dinthar VC-in District Hqrs. chhunga VC te zinga faina kawnga thawk tha ber lawmman Rs. 77,777 leh thuziak an dawn bakah Khawzawl district-a Biate khuain Urban town zinga pahnihna lawmman Rs. 2,22,222 leh thuziak an dawng bawk a ni.