Formula 1 season thar tun kartawpah tan a ni a, kum 2023 season a intlansiak hmasa ber Bahrain Grand Prix-ah Red Bull Racing leh an driver world champion ni lai Max Verstappen te an chungnung nghal.
Sakhir a Bahrain International Circuit-ah vawi hnih world champion ni lai Dutch driver hian intlansiak tir atanga tawp thleng hma a hruai a. Inrinni zan qualifying-ah tlan chak berin a hmasa ber atangin bul a tan a, a tawp thlengin amah hnaihtu an awm lo.
F1 intlansiakah vawi 36 hnehna a channa a ni a, intlansiak hmasa ber atanga a lan danin kuminah pawh a vawi thumna atana champion ni tura rin kai
ber a ni nghal.
A teammate Sergio Perez chu pahnihna niin Red Bull tan zan duhthusam a thleng. Intlansiak a lawm hlawh ber erawh vawi hnih world champion ni tawh Fernando Alonso a ni a. Tun season a mi tam tak an barakhaih tawh angin Aston Martin hmasawnna pholangin pathumna a hauh.
Verstappen chuan intlansiak zawhah, “Kan tlan chhuah tan atang khan midangte nen kan inkar tih zauh kha ka ngai pawimawh ber a, a tir khan ka ti thei nghal.”
“Khami hnuah kha chuan ka car tyre hman dan fimkhur taka ven kha a ni mai tawh a. Intlansiak tawp lamah eng nge thleng dawn a hriat loh avangin fimkhur a ngai a, mahse kan tan ni tha a ni.” a ti.
Hei le Aston Martin
British car siamtu lian Aston Martin hi kum 2021 khan Formula One-ah an kir a. Khatihlaia Racing Point ni thin team chu an thlak.
Team neitupa Lawrence Stroll-a’n F1-ah a tikimtu nih mai mai a tum lo. Silverstone-ah team hmunpui changtlung tak mai a din nghal a, hei hi kuminah an hmang tan.
Car tha an neihna turin hma an la nasa a, an thawhrim rah an seng. Kuminah pre-season test atang leh intlansiak hmasa ber zawha a landanin Mercedes nen pathumna nih an inchuh dawn a ang hle.
Kuminah world champion vawi li ni tawh Sebastian Vettel thlaktu atan Alonso an lalut a. Driver dang Lance Stroll pawhin hma a sawn. Season tan dawnah a ban ti na in zai ngai mahse intlansiak hmasa berah a inlan thei a, parukna a hauh.
“Kuminah midfield inumna velah a che tha nih kan tum a, mahse kan beisei aia tha car kan nei tih a chiang.” Alonso chuan a ti.