Beisei aia tha a season hmang leh beisei pha lova season hmangte an intawng a. Khelmual chhungah engkim inthlak danglam thungin Liverpool in inkhel duhthusam an khel a. Second half-ah Manchester United an tlusawp a, 7-0 in an mualpho.
Anfield a inkhelah Liverpool in chawlhlawk zawhah goal ruk an khung a. United in tunhnaiah hma an sawnna boruak zangkhai chu an hmet mit chiang hle.
First half-ah team pahnih inkar a zau lova, an football tha ber khel lo ve ve in an inthlau lo. United lamin Bruno Fernandes leh Marcus Rashford hmangin chance an nei a, lehlamah Liverpool pawhin goal an nawr ve reng.
Halftime hma in Andy Robertson ball pek duhthusam chu Cody Gakpo chuan goal-ah a khung a, Liverpool an pawng zawk.
Second half erawh engkim a danglam. United in minute hnih hnu lekah goal an chhuah lehnghal a, Darwin Nunez chuan Harvey Elliot ball cross a tauh lut.
Liverpool in ball an chan apiangin a hlauhawm a, United an talbuai tak zet. An lama ball a phei apiangin a goal a ni ber.
Cody Gakpo bawkin an goal thumna a khung hnuah Mohamed Salah chuan goal hnih a khung a. Nunez pawhin goal khat dang khungin minute 88-naah Roberto Firmino chuan an goal hnuhnung ber a khung.
Goal hnih khungtu Mohamed Salah hian Premier League match 205 atang goal 129 a khung tawh a. Liverpool tana Premier League goal khung hnem ber a ni bawk.
Liverpool boss Jurgen Klopp chuan, “Sawi ngaihna pawh ka hre lo. Inkhel ropui tak a ni. Team che tha lai lakah football duhthusam kan khel a, second half kan tan dan leh tawp dan kha duhthusam a ni.” a ti.