Bangladesh thuneitute chuan mi 12,000 zetin chenna tur an neih loh phah mekna, Rohingya refugee camp-a kangmei nasa tak chhuak chu an chhui zui mek.
Pathianniah kangmei chhuakah hian thi an awm hriat a ni lo va; mahse, chenna 2,000 vel kang chhiain chokaa gas bur puak atangin rang takin a inman kai tih thuneitute chuan an sawi.
Police chuan tihluiha chhuak a ni em tih an chhui mek a, tual chhung chanchinbute chuan mi pakhat man a ni tawh tih an tar lang.
He camp hi khawvela hmun khata raltlante an awm tamna ber nia hriat a ni.
A tam ber, mi maktaduai chuang chu Rohingya raltlan, an thenawm, Myanmar-a tihduhdahna tlansana lut khawm an ni.
Thawhtanni khan mi cheng tam tak chu Cox’s Bazar-a an hmunah hian letin kangmeiin an hmuhma leh thil a tihchhiatte an thlithlai.
Kangmei hi Pathianni chawhnu dar 2:45 (India-a tlai dar 3:15) vela chhuak niin an inte hi mau leh tarpaulin-a sak mai an nih hlawm avangin a inman kai chak hle niin thuneitu pakhatin a sawi.
“Chenna 2,000 vel a kang a, Myanmar mi 12,000 chuang chu awmna tur nei lovin an awm phah,” tiin Bangladesh-a refugee commissioner Mijanur Rahman chuan AFP news agency a hrilh.