President Droupadi Murmu chuan Delhi deputy chief minister hlui, Tihar-a lung in tang mek, Manish Sisodia leh Aam Aadmi Party hruaitu, Satyendar Jain te bânna a pawm tih Thawhlehni khan thuneituten an sawi.
Union home ministry-in hriattirna a tihchhuah angin president hian Sisodia leh Jain bânna hi a pawm a ni.
“President hian National Capital Territory of Delhi chief minister thurawn angin Minister Sisodia chu a pawm,” tiin hriattirnaah hian tar lan a ni.
Delhi council of ministers hi Chief Minister Arvind Kejriwal telin panga chauh an ni ta a, ani hian portfolio chan a nei lo thung.
Sisodia hian excise policy scam avanga man a nih hnuah a nihna chelh zawng zawng 18 chu a bânsan.
Delhi minister hlui tho, Jain-a hi nikum khan man a ni a, portfolio pasarih a chan chu Sisodia hnenah hlan niin department 18 zet a chelh phah a, ani pawh Pathianni khan man a ni veleh a ni.
Thawhtanni khan Rouse Avenue Court-ah hruai niin March 20 thleng judicial custody-ah awm tura tih a ni a, Tihar jail-ah dah a ni.
Jail thuneitute chuan kum 51 mi, AAP hruaitu hlun hi senior citizen’s cell-ah dah a nih thu leh tunah chuan mi dang nen pindan an intawm loh thu a sawi a. CCTV-a vil reng a ni tih ANI an hrilh.
“Sisodia hi Ward No. 9-ah awmin CCTV a awm vek a, a tanna hi Tihar Jail No. 1 a ni,” tiin jail thuneitute chuan an sawi a, tun maiah chuan a cell hi mi dangin an tawmpui hnai lo niin an sawi a. A pindan bul hnaiah erawh pawikhawihtu dang eng emaw zat an tang ve tih an sawi bawk.
AAP hruaitu hi Thawhtanni chawhnu khan Tihar jail-ah hian dah luh niin a hriselna dinhmun en fiah hmasak a ni.
‘Sparsh Kit’ an tih, ha nawhna hlo, sahbawn, ha nawhna leh ni tin mamawh dang a chhawm lut.
Minister thar pahnih ruat nghal
President Murmu-i chuan Thawhlehni vek khan Delhi-a AAP MLA pahnih, Atishi leh Saurabh Bharadwaj te chu minister atan Chief Minister Kejriwal-a thu rawn angin a ruat bawk.
Kejriwal-a hian minister-a ruat tur hian Lieutenant Governor hnenah rawtin ani hian president hnenah a thlen leh chhawng a ni.
Atishi hi Kalkaji bialtu ni lai niin Sisodia-a’n education department a enkawl laia puitu tha tak a ni a. Kum 2019 Lok Sabha inthlanah khan East Delhi bialah pawh chuhin BJP atanga chuhtu, Gautam Gambhir a hneh lo thung.
Bhardwaj-a hi an party national thupuangtu niin Delhi Jal Board-a vice chairman a ni a. Greater Kailash bialtu niin AAP sorkar hun hmasaah khan minister a lo ni tawh bawk.