Pakistan-a chanchinbu (media) viltute chuan prime minister hlui, Imran Khan-a chu sorkar hnuaia awm thil bei leh inhuatna thlentua puhin a thu sawi leh thuthar lakhawmtute a kawmna reng reng television channel-a chhuah a khap.
Pakistan Electronic Media Regulatory Authority (PEMRA) chuan khawchhak lam, Lahore-a Khan-a thu sawi chuan army chief hlui, General Qamar Javed Bajwa-a chu nikum April-a a thuneihna paih thlaknaah khan a phena a awm tih a sawi nia puhin a thu sawite tihchhuah a khap zui.
Cricketer atanga politician-a inlet, Khan-a hi ei ruk thubuaiah an khawpui, Islamabad atangin police-ten man tumin an thawm chhuak a, a hnu lawkah thu a sawi zui a. An puhnaah hian a pha a, man theih lohvin a awm bawk.
PEMRA-in khapna thu an chhuahah chuan Khan-a hian ‘finfiahna leh tanhmun tha nei si lovin inhuatna thu a sawi a, state institution leh officer-te chu nasa taka beiin dan leh thupek kenkawhna a tibuai a, vantlang muanna pawh a tichhia niin a lang’ tiin an tar lang.
Tun hi thuneihna atanga paih thlak a nih hnua PEMRA-in a thu sawite tihchhuah a khap vawi thumna a ni tawh a. Khan-a hian kawng zawh leh vantlang inkhawm liantham tak tak huaihawtin inthlan thuai a phut a ni.
Sorkarin khapna thupek a tichhuah atanga darkar hnih pawh a la liam lo tihah media regulator hian mi mal news channel palhat, ARY News chu Khan-a’n Lahore-a thu a sawi a tihchhuah avangin an license tihtawp lailawk (suspend) nghal a ni.
PEMRA chuan Khan-a lamtang an nia sawi news channel hian an thupek a bawhchhia tih an sawi a; mahse, ARY thuneitu pakhat chuan chutiang a nih loh thu a sawi thung.
“PEMRA thuchhuah hi zan dar 8:00 hnu lam niin channel zawng zawng deuhthawin Khan-a thu sawi hi dar 9:00-ah an tichhuak a. Thuneitute hian keini licence chuan min suspend si,” tiin ARY hotu pakhat chuan Al Jazeera a hrilh.
Human Rights Commission of Pakistan pawhin regulator-in khapna thupek a chhuah ta mai hi an dem thu an sawi bawk.
“Tun hma pawhin thil sawi khapna ang chi hi kan lo dodal tawh thin a, mahni duh sawi theihna zalenna atan hian kan ding zel dawn a, miin politics-a a thlirna a sawi pawh a zalenna a ni,” an ti a, khapna chu ‘rang taka hlih’ an phut bawk.
Pakistan hi chanchinbu zalen lohna ram langsar pawl tak a ni a. Paris-a inkulh, Reporters Without Borders (RSF) pawhin nikuma World Press Freedom Index list a tihchhuahah ram 180 zingah 157-na a ni.