Paris St-Germain striker Neymar chu tun season-ah a inkhel leh tawh dawn lova. A kheimit hliam zai a ngaih avangin a chawl rei dawn.
Brazil forward hi February thla khan Lille nen an inkhelh tumin a inhliam a, a kheimit dinglam ti na in inkhel zo thei lovin lakchhuah a ngai.
PSG hian an player chungchang hi sawifiahin tunhnai kum engemaw zah chhungin a kheimit dinglamah hian hliam a awm leh thin a. Hei vang hian kum 31 mi ni Neymar hi a hliam a dam chian a, a kheimit ah harsatna a awm nawn loh nan an zai dawn tih an sawi.
A club lam hian sawi belhin training a zawm leh theih hma in thla thum atanga thla li inkar vel a chawlh a ngaih tur thu an sawi tel bawk.
Neymar hian tunhnai kum engemaw zah chhungin a ke dinglamah hliam a nei thei hle a. Nikum World Cup-ah pawh khan a ke dinglam hliam avang thovin Brazil match hmasa pahnih a khel thei lo tawh.
Kum 2019 Copa America khan a kheimit dinglam a tha awmte a tihnat avangin a khel thei lo tawp tawh a. Kum 2021 khan hetiang tho hian hliam neiin hun engemaw chen chhung a lo chawl tawh bawk.
Tun season-ah Neymar hian Paris St-Germain tan season a hmang chhe lova, Ligue 1 goal 13 a khung tawh bakah midang khung tur vawi 10 a siamsak tawh. Nimahsela hmun thenkhatah erawh Neymar a awm loh a Kylian Mbappe leh Lionel Messi te inkawpin thlawptu player thawkrim an neih belhin an che tha thin zawk niin sawi a awm.
Hengte bakah a kum a tam ve tawh avang leh a inhliam leh thin bawk si avangin a club hian chhuahtir an hnial tawh lo niin sawi a awm bawk a, kum 2025 nipui thleng Paris-ah hian contract a nei.