Dutch club AZ Alkmaar chuan goal an chhuah hmasak hnuah chhangletin ‘comeback’ hnehna an chang thei a. 2-1 in Lazio lakah Europa Conference League round-of-16 first leg-ah an chak.
Thawhlehni zanah Europe a club inelna lian pathumna hi Stadio Olimpico-ah khelh a ni a. Serie A hmahruaitu Napoli hneh zo hlim Lazio in bul tan tha viau in minute 18-naah Spanish forward Pedro Rodriguez hmangin goal an khung.
Nimahsela mikhual team hi anni ang thova league a che tha lai an ni a, tunhnaiah inelna hrang hrangah match 12 chhungin vawikhat chiah tlawm an nei.
An bul tan dan nung lo mahse goal an chhuah hnuah inkhelah an langsar tulh tulh. Halftime dawnah Vangelis Pavlidis hmangin an si phurh an sut.
Second half inkhel a inhawng a, team pahnih chak tumin an innawr. Minute 62-naah mikhual team zawkin goal an khung a, defender Milos Kerkez hmangin inkhel thawhkhatnaah dinhmun pawimawh an luah.
Round of 16 return leg hi March 16 ah an khel dawn a. Roma khaw club pahnihten Europe huap inelna an khelh ve ve dawn avangin Lazio hi Thawhlehni zanah an inkhel.
AZ coach Pascal Jansen chuan inkhel zawhah, “Result hi thil mak a ni lo. He team hian theihna sang a nei a, an theihna hi ka hre chiang a ni.” tiin a team a fak hle.
Lazio coach Maurizio Sarri chuan, “Kan result hi a mak angreng, a chhan chu chance tam tak kan insiam theih laiin anni in an insiam chhun pahnih an khung. Keini lamin kan khung theih loh a tam lutuk kha kan tuar ta a ni.” tiin a thlirlet ve bawk.