Hmeichhe pahnih telin, Bangladesh khawpuia in chhawng sariha sanga ‘lirnghing ang maia na’ thil puakah mi 17 vel an thi a, mi dang 100 chuangin hliam an tuar bawk niin police leh mi chengten an sawi.
Kangthelhtu mi 200 velin a thelhna 11 hmangin Dhaka khawpuia thil puahna hmunah hian chhanchhuah leh thil chhe senghawi hna an thawk a. A puah hun hi Thawhlehni tlai dar 4:50 vel niin Old Dhaka-a mi tamna lai, Gulistan-ah a ni tih fire service control room chuan a sawi.
“Ruang 16 kan la chhuak tawh a; mahse, chhan chhuah hna thawh mek zel a nih avangin an pun ngei rin a ni,” tiin fire service thuneitu sang chuan thuthar lakhawmtute hnenah a sawi.
Hliam tuara lak chhuak pakhat chu damdawi inah a thi zui bawk a, mi 17 an thi tawh a ni.
“Thi tam zawk hi an thluak nghawr chhia an ni,” tiin Health Minister Zahid Maleque chuan a sawi.
Thil puak leh a puah chhan hi hriat a la ni chiah lo va, mi chengte chuan pisa leh sumdawnna hmuna atana hman inah hian phal loh bawlhlo dah khawmte a nih an ring.
In chim karah mi eng emaw zat an tang bawk a. “Concrete kan chhu chat a, fire service-in an thawk mek zel,” tiin thuneituin a sawi.
“A tirah chuan lirnghing niin ka hria a. Siddik Bazar huam chin pum chu a sawi a ni,” tiin thil thleng hmu, a bul hnaia dawrkar, Safayet Hossain chuan The Daily Star chanchinbu a hrilh.
“In chhe hma lam kawngah chuan mi 20-25 vel let reng ka va hmu a. Na taka inhliamin thisen pawh a chhuak nasa a. |anpuitu tur an au va, thenkhat chu chiai takin an tlanchhia a ni,” a ti.
Tual chhung miten hliam tuarte chu van leh rickshaw hmangin damdawi inah an kalpui tih a sawi bawk.
Thil puahna in bul lawka awm, Alamgir chuan, “Ring tak a puah hnuah mipuite chu rang takin an tlan chhuak a. An hmelah an chiai tih a hriat a, building tukverh darthlalangte chu kawngpuiah a tla keh nasa a, kawnga kalte pawh an inhliam phah nual,” a ti.
Rapid Action Battalion-a bomb disposal unit chuan a hmun thleng thuaiin building hi an endik nghal a, Army bomb disposal unit-in an pui zui thuai bawk.
RAB Director General M Khurshid Hossain chuan, “Thil puak hi eng nge a nih chiah hriat a la ni lo va; mahse, kan bomb disposal unit chu sipai leh police bomb disposal team nen an thawkho mek,” a ti.
“Tunah rih chuan chhan chhuah kan ngai pawimawh ber a. Chhui chian a nih hnuah chauh a chhan tak hi hriat a ni ang,” tiin Fire Service Director General Brigadier General Mohammad Mainuddin chuan thuthar lakhawmtute a hrilh bawk.
Hliam eng emaw zat chu Dhaka Medical College Hospital-ah lak an nih thu DMCH police outpost inspector Bacchu Miah chuan a sawi.
An zavai hian damdawi ina emergency unit-ah enkawl an nih thu a sawi bawk.
Damdawi in thuneituten thisen pe tura mipui an ngenna chhangin DMCH blood bank tualah pek tum mi thahnem tak an intlar nghal bawk.
Thil a puahna building-ah hian a chhawng hnuai berah bawlhhlawh sawngbawlna lam thil zawrhna a tam hle a, BRAC Bank branch pakhat chu a bul chiahah a awm bawk.
Puak hian bank hma lama dangthlalang bang chu a tichhia a, a kawng lehlama bus dinga darthlalang a tichhe vek bawk.
Police chuan tihpalh thil a nih an rin thu leh sualna kaihhnawih thil a nih a rinawm lo tih an sawi a; mahse, chiang zawkin an chhui dawn tho tih Dhaka Tribune chanchinbu chuan a tar lang.
Kangthelhtute chuan thil puak hi lei zawlah a nih thu an sawi a, a chung chhawng hnih chu a tichhe nasa hle.
Ni hnih liam ta maiah khan Dhaka-ah hian Science Laboratory huam chhungah thil puak awm tawhin mi pathum an thi a, eng emaw zatin hliam an tuar bawk.
Kar hmasa khan chhim lam lawngchawlhna, Chattogram-a mi mal oxygen plant puakah mi pasarih thiin mi thahnem takin hliam an tuar bawk.