Aizawl: Khelo India scheme atanga sum hmuh Rs nuai 500 senga Armed Venga 1st Bn. MAP Ground-a phullem phah thar leh gallery siam chu Chief Minister Zoramthanga’n nimin khan a hawng a, hri leng kara an hnathawh rah lang a nih thu a sawi.
1st Bn. MAP Ground-a phullem phahna atan hian November 25, 2019 khan Khelo India scheme atangin Rs. nuai 500 hmuh a ni a, phullem phah a nih hmain field thlang lam chu SEDP sum Rs nuai 500 leh Khelo India scheme sum Rs nuai 450 sengin RCC extension siam a ni a, a vaia sum hmuh belhkhawm Rs nuai 1,375 a ni.
Décor India- Complete Sports Solution, Guwahati-in phullem hi an phah a, February 28, 2023 khan zawh fel a ni.
Phullem phah nan hian FIFA-in design thar a pawm, ‘New technology drainboard system’ hman a ni a, phul phah chin area 110 x hian 68 mts. niin, play area 105 x 64 mts. a ni a, a sirah free space mts 2-a zau dah niin, goal post hnung ve ve-ah mts 2.50-a zau dah a ni.
Field bula RCC extension chu chhawng lia sak a ni a, room hrang hrang 10 siam a ni a. Pavilion mi 200 thut theihna tur leh a sir tawnah RCC gallery mi 500 vel ve ve thut theihna siam a ni bawk.
Phullem phah thar leh gallery hawngtu chief minister chuan football ground changtlung tak bakah hmun danga la neih ngai loh gallery hnuai lama in lian tha tak, tangkai taka hman theih tur nen lama ruahmanna hawn a ni ta chu lawmawm a tih thu a sawi a. Covid leng avanga hmasawnna hnathawh pawh a harsat karah sorkarin theihtawpin hma a la a, chumi rah chhuah chu an rawn lang chho ta zel tih a sawi.
Inkhawm hi Sports & Youth Services Department Secretary Dr. Lalrozama’n a kaihruai a, Home Minister Lalchamliana leh Sports Minister Robert Romawia Royte ten thu an sawi a, MLA thenkhat, sorkar hotu leh tlawmngai pawl hruaitu thahnem tak an tel a ni.