Aizawl: Nimin khan Lalsangzuali Sailo Branch, Thingsaiah ‘MHIP Tuiphai Block Conference’ neih niin, MHIP Gen. Hqrs President Ngurmawii Sailoin a hmanpui.
Thu sawiin Ngurmawii Sailo hian tunlai naupangin khawvel changkannain a ken tel social media hrang hrangte an khawih lawr nasain an thiam vek tawh tih sawiin, “Naupangte hi phone khawih lo turin kan ti ringawt thei lo a nih pawhin thu tha lam, kawng tha leh kawng dik kawhhmuh hi kan tih tur a ni. Chhungkua tel lovin khawtlang leh ram a siam that theih loh a, kan fate hi Kristian chhungkaw nun vawng rengin enkawl ang u. Hei hi nu leh hmeichhiate mawhphurhna a ni. MHIP hi Pathian rawngbawlna a ni,” a ti.
Ngurmawii Sailo hian ringtu, Kristian an nih angin MHIP leh kohhran hrang hrang hmeichhe pawlte hi an thawh ho that a pawimawh a. MHIP leh kohhran hmeichhe rawngbawl hna hi a inkawp tlat a, kohhranah chuan kohhran bil awm mah se MHIP-ah chuan Mizo hmeichhia zawng zawng a huap thu a sawi.
MHIP president hian hmeichhiate hamthatna lam chauh ngaihtuah loa, dikna leh rinawmna nen mi mal leh khawtlang nun siam thain Zofate hmasawn nana ke pen kawngah te, mipat hmeichhiat hman khawlohna avanga chhungkaw kehchhia te, HIV/AIDS pung zel tihziaawm kawnga hmalakna zau zawk nei tura ngaihtuahna sen a tul thu te sawiin, “Tun laiah pawm lai nei tibuaitu hmeichhia tam tak an awm a, hengte pawh hi MHIP hian kan do tur a ni,” a ti.
MHIP Tuiphai Block Conference hi President B. Lalliannguri’n a kaihruai a ni.