Mexican beauty queen lo ni tawh leh a kawppui te chu $ maktaduai 1.7 man hu zet uaiin um 45 an ruk avangin Spain ramah kum li tang tura hrem an ni.
He thil hi Spain-a Cáceres khawpuia khualbuk changkang taka kum 2021-a thleng kha niin an ni nupa hi he khualbukah hian an thleng a ni.
An tlan bo zui a, thla kua zet hnuah Croatia-Montenegro ramri-ah manin Spain-ah lak an ni.
An uaiin ruk erawh pakhat mah hmuh let a ni lo thung.
Court chuan an hming hi Tatania leh Estanislao ti chauhvin a puang a, Spanish chanchinbute erawh chuan Priscila Guevara leh Constantín Dumitru an nih thu an tar lang thung.
Court-in thu a remnaah chuan Tatania-i hi October, 2021 khan Swiss passport lem hmangin khualbuk changkang tak, Atrio hotel-ah hian a thleng.
Estanislao-a hian a hnuah zawm vein khualbuka Michelin star restaurant an tiha 14-course meal an tih mai pawh an eiin an in a, uaiin an dahna hmun, wine cellar an tih pawh kaihruaitu (guide) ruaiin an fang bawk.
Estanislao-a zawk hi a tuk zing hma takah uaiin dahna hmunah hian kal lehin a chabi an ruk hmangin a lut a. Court-a tar lan a nih dan chuan reception-ah Tatania-i’n a nghaktute a lo biak buai hlanin chabi hi a ru a ni.
Uaiin umte hi a backpack-ah a ak chhuak a, an ruk zinga um pakhat phei chu kum zabi 19-na hun laia mi tawh niin €350,000 man zet a ni.
Uaiin rua an tlan bo hnuah hian ram hrang hrang police-in an veh zui a, nikum July khan Croatia ramri kân an tum laiin man an ni ta a ni.
El País chanchinbu chuan an nupa hian uaiin an ruk hmain restaurant chu vawi thum vel an tlawh hman a, an chet dan tur an ruahman nan an ti nia hriat a nih thu a tar lang.
Court chuan an thil tihchhiatte siam thatna turin €750,000 chawi turin a ti bawk.
Hremna an tawrh tur hi thutawp a la ni chiah lo va, coust sang zawka ngaihtuah tha tura tih theihna an la nei.