US-a rorel khawl member-te chuan Covid-19 lo chhuah tan dan chu chhuiin an ngaihtuah tan ta a, Nilaini khan a vawi khat nan Washington-a ngaihtuahin an thukhawm.
Hri leng intan dan ngaihtuahtu tura panel din hi US House of Representatives hnuaiah niin member ngah zawk ni thar, Republican an tam zawk a, coronavirus irh chhuah dan hriat chu an tum ber tur a ni.
US thuneitu sang thenkhat chuan Covid hi Wuhan, China-a laboratory atanga put palh ‘a ni thei’ tiin thu an lo titlu tawh a; mahse, scientist tam tak chuan lab atanga put chu finfiahna a awm bik chuang lo niin an sawi ve bawk.
White House pawhin US sorkar chuan hri intanna chungchangah hian dinna a la nei lo tih a sawi bawk.
Republican pakua leh Democrats pasarih awmna committee hian tan lam nei lovin zir chianna lo awm tawh hrang hrang an thlir dawn a ni.
Nilainia thutkhawmah hian Democrat atanga tel lawk ber, Raul Ruiz chuan Nicholas Wade-a’n a lehkhabu ziaha a tar lan chu innghahna atan an hmang dawn lo tih a sawi.
Ruiz-a chuan New York Times-a thawk thin chanchinbumiin thu a tihtluk dan chu ‘hlauhawm tak’ a nih thu leh chutah chuan an innghah dawn loh thu a sawi bawk.
Zirna thenkhatah chuan hri hi Wuhan-ah rannung atangin mihringah a kai a, a darh tanna hi khawpuia tui leh ram sa zawrhna dawr a nih theih thu an sawi bawk.
Bazar hi khawvela hriat hlawh tham virus laboratory, Wuhan Institute of Virology bul lawka awm a ni a, he hmunah hian coronavirus hi nasa taka zir chian a ni nghe nghe.
Kar hmasa khan FBI Director Christopher Wray chuan an bureau chuan hri hi laboratory atanga put ngei ‘a nih rinna lian tak’ an nei tih a sawi.
Hemi hma lawk hian US Department of Energy pawhin hri hi Wuhan lab atanga put a ni thei tih an lo sawi tawh a; mahse, ‘a ni ngei e’ ti turin ‘rinna a la hniam hle’ tih an sawi.
US atanga hetiang thu a rik chhuah hnuah hian nasa taka hri leng lo zir chiang tawh scientist tam tak chuan lab atanga put a ni tih theihna turin science thiamna hmanga finfiahna thar engmah a awm lo niin an sawi ve thung.
University of Glasgow-a viral genomics & bioinformatics chief Professor David Robertson chuan a intan dan tak hi chu ‘theory’ mai a la nih rih reng thu a sawi ve bawk.