Aam Aadmi Party hruaitu, Delhi liquor policy-a man mek, Manish Sisodia chu Enforcement Directorate custody-ah ni sarih awm tura tih a ni.
Sorkar laipui hnuaia agency hian Delhi deputy chief minister hlui hi ni 10 tal pawisa tihchingpen thu-ah kawl an duh a; mahse, ni sarih chauh kawl phalsak an ni.
ED chuan Nilaini khan Sisodia hi sum tihchingpen thu-ah hian an man a. A hmain Central Bureau of Investigation (CBI) chuan ei ruk thubuaiah tho an man tawh bawk.
CBI-in thubuai an siamsakah hian bail a dilna chu Zirtawpni khan special court-a ngaihtuah tura tih a ni a; mahse, March 21-ah sawn a ni.
ED chuan special court hnenah hian Sisodia-a an custody kawl an mamawh chhan sawiin Delhi liquor policy thubuaiah sumte chu khawiah nge a kal tih hriat an duh vang a nih thu an sawi a. ED chuan an thubuai chhui lai hi Rs. Vaibelchhe 292 hu zet niin an sawi bawk.
“Officer-te kan ko va, custody-ah Sisodia-a hi kawm kan duh a ni,” tiin ED dan hre mite chuan an sawi.
Sisodia-a dan hre mi chuan dan kaltlang lova an dikna chanvo tih sawia ED-in mi an man chu a dik lo tih a sawi a. “Tun lai hian hetianga chet hi agency-te hian an ching ta hle a. Court hian he thil hi a ngaimawh a tul tak zet,” tiin Dayan Krishna chuan a sawi a ni.
AAP MP Sanjay Singh chuan BJP kaihhruai sorkar laipui chuan an hruaitu leh anmahni zawmtuten dan an bawhchhiatna leh puh an nihna te chu a hai der tlat zel niin thuthar lakhawmtute hnenah a sawi.
“BJP hian mi thenkhat – Himanta Biswa Sarma, Suvendu Adhikari, Mukul Roy, Narayan Rane, BS Yediyurappa leh Shivraj Chouhan ang te chu thubuai nei reng mah se a ngaihhnathiam tlat a ni,” a ti.
Kar hmasa khan eptu party pariatte chuan Prime Minister Narendra Modi hnenah lehkha thawnin sorkar laiin a hnuaia investigation agency-te a hman dan chu a dik loh thu an lo thlen tawh.