Mizoram State Legislative Assembly-a Mizo Language Development Board (MLDB) Bill, 2022 pass a nih champha vawikhatna pualin nimin khan MLDB office-ah HRD Board Vice Chairman Dr L. Thangmawia, MLDB Chairman Dr Lalzirmawia Chhangte, School Education officer te leh Mizo tawng lama hmalatu pawl hrang hrang – Mizo Writer Association (MWA), Mizo Academy of Letter (MAL), Mizo Grammar Society (MGS) aiawh ten hun an hmang.
HRD Board Vice Chairman chuan “Hun rei tak atanga Mizo tawng humhim leh hmasawnna duhtu ten an lo beisei, MLDB Bill chu Chief Minister Pu Zoramthanga thuchah bawhzuiin kum 2019 kumtawp lam atang khan HRD Board chuan a buaipui tan a, Ni 10.3.2022-a Mizoram Assembly-a lungrual taka pass a lo ni ta leh pass a nih atanga a kum khat cham kan lo thleng ta hi a lawmawm hle a ni” a ti a. “He Bill pass a nih theih nan hian Mizo tawng lama thawktu pawl hrang hrang – MWA, MAL, MGS te bakah Mizo tawng zirtirtute leh mi thahnemngaite theihtawpchhuahna a ropui takzet a ni” a ti.
L Thangmawia chuan “MLDB Bill, 2022 chu Assembly-a pass a nih hnu hian HRD Board Chairman Pu Lalchhandama Ralte, School Education Minister kaihhruaina hnuaiah chak taka a function thuai theih nan bawhzui nghal char char a ni” a ti a. School Education Department officer ten rules tul ang te an duan chhunzawm nghal thu sawiin, Mizoram sorkar aiawhin lawmthu a hrilh.
Mizo Language Development Board (Preparation and Submission of Budget Estimates Administration of Fund) Rules, 2023 chu peih a ni tawh tih L Thangmawia chuan sawiin, 27.2.2023 khan notification tihchhuah tawh a nih thu a sawi a. Chairman leh Secretary ruat dan tur rules pawh law department vet tura thawn mek a nih thu leh hun reiloteah hnathawk theia MLDB chu a awm thuai a beisei thu a sawi bawk.
Sorkar thuchhuahin a tarlan danin Mizo language Development Board office tur chu Mizoram sorkarin AIS Transit Building-2, MINECO, Aizawl-ah a ruahmansak a, office chei zawhfel ni tawhin, ni 6.2.2023 khan MLDB office chu luah tanin, Adhoc-in thawktu pathum dah lailawk nghal a ni a, MLDB Controlling Authority Dr Lalzirmawia Chhangte chuan Chairman pangngai tur ruat hma atan MLDB Chairman hna a lo hmui rih ang.