Mizoram Government Doctors’ Association (MGDA)-in nimin khan Ajail Club-ah conference vawi 37-na an hmang a, khuallian, Deputy Chief Minister Tawnluia’n Mizoram State Health Care Scheme hnuaiah inziak lut zel turin mipui a sawm.
Tawnluia chuan state health care scheme chu mipuiten tangkai zawka an hman an duhsak a, a thei apiang inziak lut turin a sawm a; Asian Development Bank (ADB) loan hmanga changtlung zawka kalpui a nih tur thu a sawi.
UD&PA changtu minister chuan Smart City Project hnuaiah damdawi in thli leh bawlhhlawh te (bio-medical waste) mumal zawka senghawi kawngah sorkarin theihtawp a chhuah tih sawi bawkin, hemi atan hian Aizawl Solid Waste Management Center, Tuirialah bul tan chhoh mek a nih thu leh MGDA member-te chu an ngaihtuahnate senga sorkar hmalaknate puibawm turin a sawm bawk.
Deputy chief minister chuan doctor hna chu hna zahawm leh rawngbawlna ropui a ni tih leh tihdam hna an koah a tlak avangin an hnathawh leh mawhphurhna chu hna dangte aia a danglam thu a sawi a, mi dangte rawngbawl tura kawng zawh zel turin doctor-te chu a sawm.
Mizoram Health Service Rules siam that kawnga hmalakna awm tawhte sawi bawkin harsatna awm mek ching fel turin DP&AR-in hma an lak mek thu leh cabinet meeting-a put luh thuai a nih a beisei thu a sawi bawk.
MGDA Annual General Conference hi an pawl Vice President Dr. C. Lalhrekima’n a kaihruai a, kum 2019 atanga 2023 chhunga an member pensiona chhuak mi 24-te thlahna hun leh member boral mi pasarih sunna hun an hmang a. Chawhnu lamah hruaitu thar thlanna hun leh business session neih a ni.