- Mahmuaka Chhakchhuak
In the end we will remember not the words of our enemies but the silence of our friends
– Martin Luther King
Baptist Church of Mizoram hnuaia Puithiam hna thawk a, Kohhranin thawh hunbi an siam, Pension hun thlenga a thawh hnu pawha Kohhranin khaipa bera an la thlan a, President hial la ni thei Rev. Sangvela nen hian kan inhriatna ala rei lo viau nain kan inhre tha ve ta hle maiin kan inlungrual ta viau thin a. Tumkhat chu kan pahnihin thil pawimawh takah hian Lunglei atangin Aizawl kan kal a, zankhat kan riak tlang nghe nghe a. Chuta kan kalnaah chuan kawng tluanin kan titi a, Karbi Anglong khawpui Diphu-a a awmlai chanchin min hrilh a, keipawh kum khat aia tam mah ka lo awm ve tawhna a nih avangin kan titi pawh a rual hle mai. Chumi hnuah Phuaibuanga Bialtu Pastor bawka a awmlai chanchin a sawi lehin Pu Rosiama (Famta) vanga Phuaibuang ka lo tlangnelna leh la tlawh lo mah ila mahni khua ang tluk dawna kan lo intih tlangnel vena khua a nih avangin an chanchin tlem a zawng ka lo sawi ve thei leh zul bawk a, midang vengthawng lutuk loin kan pahnih chuan kan titi char char a, kawngin min daih lo a ni ber zawk e.
Chutiang taka ka mi ngainat tak mi chuan March 7, 2023 niah khan Lunglei khawpuia Office pawimawh ber High Power Committee (HPC) Office tualah lungawih lohna lantira Sit-in-Demonstration neihnaah thu a sawi a, lungawih lohna lantir a nih ang ngeiin lungawih lohna thute chu pangngai taka sawi mai tura ka ngaih laiin a ni chuan tihtakzetin a sawi a, a sawi zel a, tawngkam a thiam hrim hrim bawk nen chuan kan thinlung a pawt hnai thiam riau mai a. Sakhaw puithiam, kum 75 mi lai ni tawhin Kohhran mipui hma mai niloa mi zawng zawng hriattura a sawi chu a pawimawhna leh a tulnain a urthlu ngang tawh a nih ngei pawh a rinawm a. Chutianga a sawinaah chuan alawm Rev. Sangvela chu a mittui tla lai ka hmuh a, keimahni ngei pawh mittui tla dawn hiala min awmtir ni. A ka a chih a, reilote chhung chu a tawng hleithei lo a, nimahsela inthing harh leh vatin a thusawi lai chu a rawn sawi chhunzawm leh a, a tawp lamah phei chuan……kan ngawih rengna hian a siam tha dawn emaw kan tih laiin kan ngawih rengna hi remchangah siamin min palzut zawk emaw ni. Chuvang chuan kan ngawi reng tawh dawn lo a, kan sawi zel dawn a, kan la sawi zel bawk dawn a ni. Tiin a sawi a.
Hetiang taka kan sakhaw puithiamin mittui tla hiala a sawi tak hi thu mai mai a ni loin tute Party beihna leh tute Party hamthatna lam tur thu emaw pawh a ni lo a, Lunglei khawpui tan, ni lo, Chhimbial mipui zawng zawng tan zawk a ni a, Lawngtlai leh Siaha khawpui leh an chhehvel khaw zawng zawngte nena kan kumkhaw nawmna tur atana thil pawimawh tak chungchang a ni.
Mizoram Legislative Assembly Budget Session hnuhnung berah khan Congress Party MLA, Pu Zodintluanga chuan Feb. 23, 2023 niin hetiang hian Chief Minister, PWD changtu chhan atan zawhna a zawt a; Congress Sorkarin Lunglei By Pass Road atana Sum a dah khan eng atan nge hman a nih? A ti a. Pu Zoramthanga, CM chuan ‘Congress Sorkar khan Lunglei By Pass Road siamna tur Rs. 9.0 Crores dah alo ni tawh a, Consultant te rawih a ni a, Rs. 9 Crores atang hian Consultant rawih nan hman then a ni. A bang Rs. 8.8 Crore hi Lunglei khawchhung cheina, improvement Lunglei Town Road atan hman tur a ni. Kum 2018 khan Congress sorkar khan NEDP hnuaiah Lunglei By Pass Road siam nan cheng Vaibelchhe 10 (Nuai 1000) a dah a, kum 4 zet a liam a, tun thlengin By Pass Road chu siam ala ni lo. By Pass Road simna tura sum dah chu Lunglei khawpui chhung veng hrang hrangte inkalpawhna tur kawng siam nan hman a ni ta mai chu hriatthiam har kan ti a, sorkar-in Chhim lam a ngaihthahzia tih lanna chiang takah kan ngaih avangin vawiinah hian Sit-in-Demonstration kan huaihawt alo tul ta a ni a ti a.
A sawi zelnaah chuan Lunglei khawpui chhung State Highway kawngpui siamna hi chu SASCI (Saski) suma siam tur a ni. Hemi bak Lunglei khawpui chhung veng hrang hrang inkalpawhna kawngpuite siamthat nan hian cheng Nuai 500 hi By Pass Road sum hmang niin a sawi a. Veng hrang hrang inkal pawhna siam that nan hman a ni tih hi PWD hian veng hrang hrang inkal pawhna tha chu a siam chiah em? Hmuh tur kan nei em? By Pass Road sum hmang lo hian source dang atang pawhin hman ve mai tur a ni a, engah nge By Pass Road sum chu a han hman kher kher. Nuai 880 atanga Nuai 500 hi a lo hmang a nih pawhin Nuai 380 hi engtinnge an tih tak zel? State Highway hi SASKI sum hmanga siam a nih si chuan Nuai 880 hi thil dang atan an lo pawt peng zo vek tawh a ni mai ang em tih hi kan hre ta lo a ni tiin Chhim bial Chhantute’n Sit-in-Demonstration an huaihawt chan chu fiah takin a sawi a. By Pass Road chungchanga kum 2019-a an hma lo lak tawh dante sawiin Aizawl – Lawngtlai – Siaha khawpuia bungraw phur lirthei lian tak takte’n Lunglei khawpui chhung pal tlang kher loa an kal theihna tur a nih dan sawi bawkin kan tangkaipui dan tur a sawi bawk a. A dik chiah a, Lunglei khawpui chhung kawngpui chhiat chhan ber pawh Lirthei lian tak takin chhun zan zawma an rah reng vang a ni a, heti reng chuan tunah han siam tha bawk mahsela a la chhe leh thuai lo ang tih pawh a sawi theih loh.
Martin Luther King chuan ‘In the end we will remember not the words of our enemies but the silence of our friends’ a ti a, Mizo tawng chuan ‘A tawpah chuan kan hmelmate thu leh hla hi kan hriatreng tur a ni lo a, kan thiantha ngawi rengte hi kan hriat reng tur zawk chu a ni’ tih thu sawiin a sawi hunlaia kan sawi loh chuan thang leh tharte hian min dem dawn lutuk a, Keini Putar ho hi engvanginnge kan dinchhuah kan tih chuan a tul tawh a ni tawp. Chuvangin Mizoramah hian eng Party pawh lalin thuneihna chang mah ula thil hi in tih dik loh chuan keini ho hian kan hmachhawn zel tawh dawn che u a ni tih hi lo hria ang che u tiin a sawi leh bawk a ni. Hetiang taka Rev. Sangvela thusawi hi ka la ngaithla ngai lo a, mak ka ti a, a tihtakzetna chuan ka thinlung a hneh hle bawkin a thusawi rite chu vawiin thlengin thinlungah ala inthumrawn tluk tluk a, kum 75 miin khatia thahnemngai taka a sawi khan awmzia ala neih chhoh zel pawh a rinawm.