Cyclone Freddy chuan thla khat chhunga a vawi hnih nan khawmual a kai mek laiin Mozambique-ah ruah tam tak, thlipui na tak leh tui lian a thlen mek.
Africa chhim lam ram hian chawlhkar li liam ta chhungin kum khat chhunga an ruah dawn zat thin aia tam an dawng hman tawh.
Freddy hi chhinchhiah china storm thawk rei ber niin ni 34 liam ta khan Australia hmarthlang lama insiam kha a ni.
Mi pakhat thi awmin a hmasaa khawmual a kai tawh nen mi 28-in an thihpui ta a ni.
Cyclone hian Inrinni zan dar 10 vel (India-a Pathianni zing dar 1:30) velah khawchhak lama lawngchawlhna, Quelimane bulah khawmual a lut.
Mipuite chu inhumhimna tur hmun siam – sikul, biak in leh warehouse-ah te lo awm lawk tura hriattir an ni.
Tun tuma a thawk hi mi nuai nga vel buaina thlen thei tur a nih thu tual chhunga disaster agency-te chuan an sawi.
Thi hi thlipui na takin a nuai avang hian a chenna in chimin a chim hnan niin Reuters news agency chuan sorkar TV channel, TVM puan a chhuah chhawng.
TVM chuan a hmain electric tihtawp vek a ni a, thlawhna thlawk turte pawh thulhtir an ni tih a puang bawk.
Cyclone hian tuipui kam a nuai na hle a, khawmual laili lam a pan mek zel.
Charity worker Vania Massingue chuan, “In thenkhat chung thliin a lak te, tukverh tla leh khawlaia tui tling tam tak ka hmu a, a rapawm hle a ni,” tiin Zambezia province-a Quelimane khawpui atangin Reuters a hrilh.