Namibia atanga cheetah lak luh zinga pahnih, Oban leh Aasha te chu India thlenpui a nih atanga thla ruk dawn hnuah Inrinni khan Madhya Pradesh-a Kuno National Park-ah ram hnuaiah chhuah a ni ta a, a hma khan ‘ramsa pelhna hmun’-ah awmtir a ni.
Nikum September 17 khan Prime Minister Narendra Modi chuan Namibia atanga lak luh cheetah pariat chu KNP-a khung hranna, quarantine enclosure-ah a chhuah a. Hei hi kum 1952-a Chhattisgarh-a pelh rem a nih hnuah India-a awmtir tum leh tumna pakhat a ni.
Union Environment & Forest Minister Bhupendra Yadav chuan cheetah chhuah zalen takte hi a nu leh a pa an ni a, an hriselna a tha tih Twitter-ah a tar lang.
Asha hi nikuma Namibia atanga lak luh a nih hnua Modi-a’n Boma-a a chhuah hmasak ber kha a ni a. “Forest thuneituten Inrinni khan ramngawah an chhuah ta a, an awmna lai hi satellite collar hmanga en zui reng an ni a. Forest guard-ten an thlithlai reng bawk a, ram ngaw atang chuan an chhuak lo vang,” tiin KNP-a field director Uttam Sharma chuan a sawi.
Kum nga mi, Oban hi Inrinnia tuka chhuah hmasak a ni a, Asha hi kum thum leh a chanve niin chawhnuah chhuah a ni thung a. An hrisel tha a, ramngaw an pan nghal ve ve a ni.
A hmain unau, Elton leh Freddie te chhuah tum zet an ni a; mahse, man mai theih an nih loh avangin Oban leh Asha te chhuah an ni ta zawk.
Ramngawah hian cheetah dang pathum chhuah leh thuai tum a ni bawk a, a la bang pathum dang, a nu vek erawh chhuah turin thla tlem nghah deuh turin ruahmanna an siam thung.
South Africa atanga February 18-a lak luh cheetah 12 pawh khung hranna, BOMA atanga chhuahin ramsa an pelh theihna hmunah March 18 khan chhuah a ni tawh a, ramngawah chhuah veleh thuai an ni ang