Europe ram tam tak chuan Russia-in boruak lian tak asiam avangin ralthuam an chaw lut thar nasa hle tih think tank rintlak tak pakhat chuan a sawi a. Ukraine pawh nikuma Moscow-in a rûn hnuah khawvela ralthuam chaw lut tam ber pathumnaah a kai ta.
Stockholm International Peace Research Institute (SIPRI)-in Thawhtannia report an tihchhuah tharah European ramten kum nga chhung, kum 2018 leh 2022 inkara an ralthuam lak luh chu a hma kum nga aiin 47 zetin a tam zawk tih tar lan a ni.
Europe-a NATO ramten ram dang atanga ralthuam an lak luh punna chu a sang hle a, 65% zetin a pung.
Hetih lai hian khawvel pum anga chhut chuan ramin ram dang atanga ralthuam a lak luh a tlahniam a, 5.1% laiin a hniam.
“Khawvel pumah ralthuam chaw luh a tlakhniam laiin Europe bikah chuan Russia leh European ram dang tam tak inkara neuh neuh a awm avangin a sang hle,” tiin SIPRI Arms Transfers Programme-a senior researcher Pieter D Wezeman chuan a sawi.
“Russia-in Ukraine a rûn atang khan European-te hian tam zawk leh rang zawka ralthuam lak luh an duh ta a ni,” a ti.
United States, France leh South Korea ramte chu kum nga liam ta chhunga Europe rama NATO member-te hnena ralthuam thawn nasa ber an ni a. US, Poland, Germany leh United Kingdom te chu nikum chhunga Ukraine hnenah ralthuam thawn tam ber an ni bawk.
Ukraine hnena ralthuam thawn tam ber hi hman hnu, a thawntuten an lo kawl that (second-hand) a ni tlangpui a. Heng zingah hian US-in laipui 228 leh artillery rocket 5,000 a thawn te, Poland-in tank 280 a thawn leh UK-in anti-tank missile 7,000 a thawnte pawh a tel tih SIPRI chuan a tar lang.
US-in Ukraine-a ralthuam a thawn a pun nasat hle lai hian ram dang pali – Kuwait, Saudi Arabia, Qatar leh Japan hnena Washington-in a thawn thin zat chu a tlahniam hle bawk niin SIPRI chuan a sawi.
Hei hi a chhan ber chu US hian Ukraine hnenah hian ralthuam tha lo zawk leh an hman hnu a thawn deuh ber a, ram dang pali hnenah erawh a thar tha tha, combat aircraft leh air defence system te a tel vang niin think tank chuan a sawi bawk.