Manik Saha chuan Tripura chief minister atana lak luh a nih hnu ni reilo teah Thawhtanni khan Prime Minister Narendra Modi hmuin an state mamawh thil hrang hrang a sawipui.
BJP hruaitu, kum 70 mi, Saha hi Nilaini khan chief minister atana lak luh a ni.
A rual hian minister atan mi pariat – Ratan Lal Nath, Pranajit Singha Roy, Santana Chakma, Bikash Debbarma leh Sukla Charan Noatia te chu Governor Satyadeo Narain Arya chuan rinawmna thu tiamtirin a la lut bawk.
Chief minister a nih hnua ram khawpui ber a tlawh hmasak berah Saha hian prime minister a hmu nghal a. Prime Minister’s Office chuan, “Tripura “Chief Minister Dr Manik Saha leh PM Narendra Modi an inkawm,” tiin Twitter-ah a tar lang.
Tun hnaia Tripura assembly inthlanah khan BJP hian bial 60 awmah bial 32-ah hnehna an chang a, an thawhpui, IPFT chuan bial khat an la ve bawk.
Saha hi kum 2022 khan Biplab Kumar Deb thlakin chief minister a ni tan a, term tharah pawh a nih chhunzawm leh ta a ni.