Manipur-a Churachandpur district-a ramngaw humhalh laiah ram nasa takin a kang a, thelh tumin theihtawp chhuaha beih mek a ni.
Kangmei chhuahna hi Henglep sub-division-a Langjing Manbi reserved forest-ah niin hmun tam takah ram hi a kang mek.
Bishnupur forest zone huam chhunga awm niin thli chak tak a tleh reng avangin a inman kai chak hle a, a huam chhunga thil zawng zawng deuhthaw a kang chhia niin thuneitu sang chuan Thawhtanni khan a sawi.
Ram kang hi Pathianni chawhnua chhuak tan kha a ni a, Manipur Fire Services leh police bakah civil mi thahnem takin thelh hna thawk mah se a sawt mawh hle niin a sawi bawk.
Ramngaw humhalh chin hmar lam atangin kangmei hi a intan a, mihring tih a nih ngei a rinawm thu a sawi bawk.
Mei hian thing hniam deuh leh phul hmunte chu a kang chhe vek a, ramsa tenau, sava leh rannung dang tam tak an kang hlum bawk.
A hmun kang chhe bakah hian a khu dum tak chhuak leh boruak hlauhawm chhuak a tam a, hei hi a bul hnaia cheng mihringte khawsak tibuaiin an hriselna pawhin a tuar theih thu thuneitu chuan a sawi.
Kangthelhtute chuan theihtawp chhuah mah se thli a na em em a, a thing a rovin lei a ro em em tawh a, thing tlu ro a tam sa bawk si avangin a inman kai chak a, thelh a sawt lo hle niin a sawi.
Helai ramngaw humhalh laiah hian April, 2022 khan kangmei nasa tak a lo chhuak tawh bawk a. Thil tam tak a tihchhiat hnuah sorkar chuan tun din thar leh a tum a, a ramngaw pawh a hring tha leh hman viau tawh a ni.
Forest department thuneitute chuan tun dinhmunah chuan kangmeiin a tihchhiat hlut zawng hi chhut chhuah mai a la harsa niin an sawi.