P&E Minister R Lalzirliana’n Mizoramin kawlphetha hnianghnar zawk a neih theihna turin DPR hrang hrang an siam mek niin a sawi.
MNF party adviser ni bawk, R Lalzirliana chuan nimina MNF party chhung inkhawmah he thu hi a sawi a. Aizawl khawpui chunga electric hrui inzam hnawk nasa lutuk pawh felfai taka ABC line-a thlak thuai a nih tur thu a sawi a. Mega watt 25 pe thei tur Vankal solar power project pawh hman theih tura commission thuai a nih tur thu a sawi.
R Lalzirliana chuan kumin kum tawpa MLA inthlan lo awm turah MNF an tling leh dawn nia sawiin, “Zoram mipui leh party mipui tan a vur kum a thleng dawn,” a ti a. ZPM party chungchang sawiin, an MLA-te chu Val Upa Council thu zawm lovah a puh a. “VUC chuan VIP culture tihhniam te, MLA hlawh tihhniamte an sawi ve thin a, an MLA-te erawhin an zawm reng reng lo,” tiin, “Opposition an nih lai pawha an zawm lo a nih chuan engtikah mah an zawm reng reng lo vang,” a ti.
MNF adviser chuan, “ZPM chu a tha zawnga Zoram kaihruai ngam tur anga insawi, party dang zawng aia danglam ngam tura ngaih, Pathian pawh hnaih bik riau nia insawi thin ni mah se danglamna hran an nei lo,” a ti a. “An hotupa ber, an thiampuipa Pu Duhoma danglam bikna hi politics-a pawl sawn tam bak hmuh tur a awm lo,” tiin, Tuirial bye-election-a ZPM chet danahte kohhran rawngbawltute rilru a na hle niin a sawi bawk.