Aizawl: Lunglei Municipal Council (LMC) inthlan lo awm tur atan nimin khan Zoram People’s Movement (ZPM) party-in campaign beihpui thlak tanin manifesto an tlangzarh nghal.
Convention Centre-a LMC campaign kick-off leh manifesto tlangzarh inkhawmah ZPM Leader chuan Mizoram chu politics-a harh tharna thlipuiin a nuai mek a, a bikin thalaite zingah chu politics-a harh tharna chu a thleng mek niin a sawi a. LMC inthlan lo awm tur atana ZPM party tana candidate thalai rual, zirna lamah pawh mi thiam tak tak an pen chhuak hian Lunglei khawpui tan hmasawnna mek lung pawimawh tak an phun ngei a rin thu a sawi a. Dik leh rinawm taka ram rawngbawlna hna pawimawh tak thawk chhunzawm zel turin a chah.
Lalduhoma hian Lunglei chungchang an sawi hian chhim bial zawng zawng an sawina a ni tih sawiin, “Lunglei tel lovin a piah lam khuaten hma an sawn thei lo va, Lungleiin hma a sawn chuan a piah lam khuaten chawp leh chilhin hma an sawn ve mai a ni. Chuvangin, Lunglei khawpui hi chhim bial zawng zawng tan a dam a ngai tak zeta, a damloh a thiang lo a ni,” a ti.
ZPM General Hqrs. Lunglei President Lalrinpuii kaihruai inkhawmah hian Lalduhoma’n an party-ah mi thar a lawm lut a. Rev. Dr. K. Thanzauva, Vice President, ZPM General Hqrs., Aizawlin LMC inthlan lo awm tur atana ZPM party manifesto a tlangzarh a. ZPM legislator member ni lai, Lalchhuanthanga leh C. Lalsawivunga ten he hun hmanpuiin, LMC inthlanah ZPM party candidate turte leh mi thar lawm luhte atangin thusawi ngaihthlak a ni bawk.