March 29-a Lunglei Municipal Council (LMC) thlan tura chuh tumte nomination paper chu nimin khan endik a ni a, pakhat hnawl a ni.
Ward 11 awmna LMC inthlana chuh tuma hming pe mi 43-ten Zirtawpni khan nomination paper an thehlut a, nomination paper-te chu returning officer pahnih, Donny Lalruatsanga leh M. Misaela ten an endik a, mi 42 pawmin Ward No. II-a BJP candidate chu kum 25 a la tlin loh avangin hnawl a ni.
BJP hian candidate tur hming 11 puang mah se Ward No. 4-a ding tura an puan, Lalzarmawia chuan nomination a file lo nia thudawn a ni a. Nomination paper-te endik a nih hnuah Ward No. II-a BJP candidate chu inthlan chuh thei tura kum bithliah, kum 25 a la tlin loh avanga hnawl a nih bawk avangin LMC ward 11 awmah BJP chuan ward pakua chauh an chuh dawn ta a, party dang – INC, MNF leh ZPM ten ward awm zawng zawng an chuh kim dawn thung.
LMC inthlanna chuh tura nomination file-te tan vawiin tlai dar 3 thlengin inhnuhdawh theihna hun hawn a ni.
LMC inthlan hmasa ber tur atana inpuahchahna kal zelah inthlan kalpui dan endik tura State Election Commission-in a ruat, Election Observer Dr Lalngura Tlau chuan nimin khan Lunglei a thleng a, hming pek luh endikna (scrutiny) pawh a enpui nghal.
Election observer hian tunkar chhungin polling station-te a tlawh chhuak dawn a, election training leh candidate puante hmanpuiin a endik dawn bawk a ni.