Thla khat chhunga a vawi hnih nana Tropical Storm Freddy-in Africa khawmualpui chhim lam a nuai hnuah Malawi-a an sumdawnna hmunpui ber, Blantyre-ah chuan ruang 60 chuang zet hmuh chhuah a ni.
Thli na tak leh ruah tam tak sur chuan chhiatna a thlen nasa hle.
“Lui a luang liam nasa hle a, mite chu tuiin a la a, in tam tak a chim bawk,” tiin police thupuangtu, Peter Kalaya chuan BBC Focus a hrilh.
Malawi chuan ‘a tuar nasa tak zet’ tih a sawi bawk.
Ruah hân thei lo leh thli na tak chuan an ram chhim leh hmun lailia emergency team che chhuak pawh a tikhawlhkham nasa hle niin Kalaya chuan a sawi.
Thing tlu, lei min leh tui lian avanga hliam tuarte chu Blantyre-a damdawi inah lak an ni hlawm tih Doctors Without Borders (MSF) country director Marion Pechayre chuan Reuters news agency a hrilh.
“In tam tak hi hlum leh rangvaa sak an ni a, a chung chimin a delh hlawm a ni,” tiin a sawi.
Thi leh hliam tuar zat hi an hriat belh zel tih Malawi-a department of disaster management thupuangtu, Chipiliro Khamula chuan a sawi a. Hmun tam tak tlawhpawh theih lohva an la awm avangin thuneitute chuan chanchin hriat kim hunah thi zat an pun ngei an ring.
Freddy hi tropical cyclone thawk tawhah chuan a na ber leh a rei ber pawl a ni tih World Meteorological Organization chuan a sawi.
Pathianni khan cyclone a la nih laiin Mozambique a nuai a, hei hi thla khat pawh tling lo chhunga Indian Ocean-a awm, Madagascar a nuai hnua thleng niin chhiatna a thlen nasa hle.
Mozambique-ah hian hmun tam takah power supply leh phone signal a la chhiat avangin thi zat hriat kim theih a la ni lo.
Malawi a nuai hun hi tuihri a len lai niin UN leh pawl dangte chuan vantlang hriselna dinhmun a derthawn lai ber niin an sawi.
Mi thiamte chuan sik leh sa inthlak nasa chuan khawvel pumah tropical storm thawkte chu tui a pai tamtir sawt a, a thlipui ken a na sawt bawk niin an sawi.
Freddy hian a chak lamah a hmaa lo awm tawhte khumin a zinkawng pawh km 8,000 chuang zet niin Indian Ocean-a Australia hmarthlang lam atanga insiam a ni.