Aizawl: BJP CADC District Committee chuan Lawngtlai District Bawrhsap David Lalthantluanga leh Local Administration Office, CADC Ram Muni Chakma te chu dik lo taka village council-a member pahnih bânah an puh.
Nimin khan Kamalanagar-ah thu thar thehdarhtute kawmin BJP CADC District Committee chuan, tun hnai khan MNF MDC atanga BJP party zawmtu Kamalanagar-III Village Council nominated member pahnih Talukdar Chakma leh Lokhi Loda Chakma te chu dan mumal tlawhchhan nei lo leh show case notice pawh pe loin Lawngtlai district bawrhsap leh CADC LAO-ten bânah an puh a. CADC-ah anti-defection dan hman theih a nih loh avangin Village council memberte’n political party eng pawh an zawm a thiang niin an sawiin, hetianga an hmalakna hi CADC-a party pakhat duhdana rorelna a nih thu an sawi.
BJP CADC District Committee hruaitute chuan, CADC enkawl lailawk tura ruat Lawngtlai bawrhsap hian eng political party mah hi duhsak turin chanvo a nei lo nia sawiin, dan angin thuneihna a kengkawh mai tur zawk a nih laia, hetianga thuneihna a hmang ta mai hi Lawngtlai bawrhsap leh CADC LAO chu an nihna atanga ban nghal turin Mizoram larsap an phut thu an sawi bawk.
He hunah hian Dr. Buddha Dhan Chakma, MLA, District President, BJP CADC, Nirupam Chakma, National Council member, BJP Mizoram Pradesh, Moni Sangka Chakma, VCP, K-III, Ahoze Chakma VCM, K-III leh Ranga Udi Chakma, VCM, K-III an tel a ni.