Mizoram Pollution Control Board (MPCB)-in Aizawlah lirthei khu endikna, pollution testing centre pathum a nei a, centre-te chu sorkar chawlh tih lohah chuan ni tin hawn a ni a; traffic police-ten khauh taka dan an kenkawh apiangin a lun thin.
Aizawla pollution testing centre zinga MINECO-a mi chu pantu ngah ber an ni a. Lirthei endik runpui neih a nih loh lai chuan lirthei khu endik ni khatah 20-40 inkar vel chauhte an endik thin laiin, nikum kum chawhnu lama The Motor Vehicle (Amendment) Act, 2019 hman tan a nih dawn lai erawh kha chuan ni khatah lirthei 500 vel endik ziah ang an ni thung.
August 22, 2022-ah transport department hotuten MV Act siam that hman a nih tur thu an puang a, hemi ni atanga August thla tluan khan lirthei khu endiktir tum an thahnemin mipui chetvelna pawh a tihbuai phah hial a ni.
March 13, 2023 atangin Aizawl Traffic Police leh transport department thawk dunin Aizawl khawpui chhungah special drive an kalpui leh a. Hemi avang nia ngaih theihin pollution testing centre-te chu a lunin lirthei endiktir tum intlar an thahnem leh tawh hle a. The Zozam Times-in MINECO-a pollution testing centre a tlawh lai pawhin lirthei ke li nei leh ke hnih nei, endiktir tuma intlar thui tak hmuh tur an awm.
Chanchinbu lamah pawh December 13, 2022 chhova Aizawl traffic police-ten no tolerence checking an kalpui lai pawh khan pollution testing centre-te a lun thu tar lan a ni tawh a ni.
Hemi chungchanga zawhna chhangin MPCB hotute chuan centre chu mipui tan an hawn reng thu leh lirthei neituten hun tihek zawka an centre an pan thin chu an hriatthiam loh thu a sawi a. Traffic police-te an khauh loh lai pawhin dan angin an lirtheite chu endiktir thin thei se an duh thu an sawi.
March 31, 2023 thleng awh tur special drive kalpui mekah hian duty-ten lirthei dan bawhchhia thahnem tak an man tawh a. Bul an tan ni, Thawhtanni khan lirthei dan bawhchhia an mante sum chawi tlingkhawm chu Rs 1,30,000 a tling tih duty-ten The Zozam Times an hrilh a ni.