Indian Super League champion nih inchuh tur a chiang tawh a. Bengaluru FC hmaah Kolkata club ATK Mohun Bagan an ding dawn.
Thawhtanni zanah playoff semi-final hnuhnung zawk second leg-ah khelh a ni a. An inkhelh hmasak ang bawkin goal inpe lovin an inhnehtawk a, penalty shootout hmanga chak zawk zawnnaah 4-3 in ATKMB an chak a, champion lai Hyderabad FC in final an thleng zo lo.
Bengaluru hi vawi hnih final lut tawh niin kum 2018–19 season khan an champion a. ATKMB hian 2020–21 khan final khelin ATK leh Mohun Bagan inzawm hma in ATK angin tum thum an champion tawh.
Ferrando ruahmanna
Semi-final inkhel hnuhnung ber in ngaihven a hlawh a. Team tha pahnih, inrualkhai tak mai an ni.
ATKMB chu goal nawr na zawk an ni a, Hyderabad lakah an langsar zawk. Mahse goal an khung thei bik lo.
Lehlamah Hyderabad in an khingpuite tlarhnung chhaihbuai an harsat a. Second half-ah set piece atanga Bartholomew Ogbeche chance neih chu an goal khung teuh ber a ni.
ATKMB head coach Juan Ferrando chuan final lut turin thulukna a siam fuh.
Season tluan a che tha Australian centre-back Brendan Hamill aiah Serbian defender Slavko Damjanovic chu a tlarhnungah a din tir.
Damjanovic hi Hyderbad FC lakah a ding khawng hle a. An striker rinrawl Ogbeche a ven hneh mai bakah an tlarhnung hokhawmtu pawimawh a ni.
Ferrando chuan inkhel zawhah, “Kan inkhelh tan atangin kan tum a danglam lo. A tawp thleng a nawr kha kan tum tawp a, chak ngei ngei tum khan extra-time ah pawh kan la khel.” a ti.