Union Agriculture Minister Narendra Singh Tomar chuan tun dinhmunah chuan khaw lum lutuk avanga wheat chin kawnga harsatna a thlen hriat tur a la awm lo tih a sawi a, hetih rual hian a nghawng dawn lo tih sawi nan chuan a la hma tih a sawi bawk.
Madhya Pradesh leh state dang thenkhatah wheat hi seng hun lai niin khaw lumin thar chhuah a nghawng hlauhna a lian hle a. Tomar chuan, “Sik leh sain lo neih a nghawng hi chu thil thleng reng reng a ni sa a; mahse, tun thleng hi chuan chu chu a la awm lo niin ka hria a. Nghawng a nei miah lo tih sawi nan erawh a la hma,” tiin thuthar lakhawmtute hnenah a sawi.
Tomar hian Plant Based Food Industry Association (PBFIA) hun an buatsaiha a sawi a ni a. Wheat hi thlasika chin chi thlai a ni.
February 20 khan sorkar chuan a hun pangngai hmaa khaw lum thlithlaia wheat-ah engnge nghawng a neih en tur committee a din a, lo neitute hnenah an thlai a him theihna tur thurawn pe tura tih an ni bawk.
Ram chhung hmun thenkhatah a nih dan thin pangngai aia khua a lum hma avanga he committee hi din a ni.
India-in wheat a thar hi 2021-22 khan tonne maktaduai 107.74 niin a hma kuma tonne maktaduai 109.59 a thar a phak lo va, hei hi a thar tam thin state thenkhata khua a lum vanga ngaih a ni.
Nikum May thla khan sorkar pawhin thar chhuah a tlem avang leh FCI-in dah khawl tura a ruahman zat phak loh hnuah a man thunun nan ram danga wheat thawn chhuah a khap hial.
Sorkar hian kum 2022-23 chhung hian tonne maktaduai 112.18 erawh thar a inbeisei.